ئەنجوومەنی وەزیرانی كوردستان لەبارەی پرسی مووچە کۆدەبێتەوە

ئاڤا نیوز

ئەنجوومەنی وەزیرانی هەرێمی کوردستان بەسەرپەرشتیی مەسرور بارزانی گفتوگۆ لەبارەی پرسی مووچە و شێوازی دابەشکردنی دەکات.

چیرۆکی سەرەکی: سبەی چوارشەممە 24-6-2025، ئەنجوومەنی وەزیران بەسەرپەرشتیی مەسرور بارزانی بۆ ماوەی دوو کاتژمێر (10:00 بۆ 12:00) كۆدەبێتەوە و گفتوگۆ لەسەر دوو تەوەر دەکات.

زانیاریی تایبەت: بەپێی کارنامەی کۆبوونەوەکە کە دەست ئاڤا کەوتووە، دوو پرس تاوتوێ دەکرێن:

یەکەم: تاوتوێكردن و هەڵسەنگاندنی بارودۆخی دارایی ئێستای هەرێمی كوردستان بەتایبەت مووچەی مووچەخۆران،  كە ماوەی دوو مانگە بە بڕیارێكی نادەستووریی وەزارەتی دارایی فیدڕاڵ خەرجكردنی شایستە داراییەكانی هەرێمی كوردستان ڕاگیراوە و دوا هەوڵەكانی بۆ چارەسەركردنی ئەم بابەتە، لەمبارەیەوە وەزیری دارایی ڕاپۆرتێكی فراوان دەخاتە ڕوو.

دووەم: خستنەڕووی ڕاپۆرتی  وەزارەتی كار و كاروباری كۆمەڵایەتی / بەڕێوەبەرایەتیی گشتیی كار  و دەستەبەری كۆمەڵایەتی بە نووسراوی ژمارە (506) لە 2/6/2025،  سەبارەت بە خانەنشینی و دەستەبەری كۆمەڵایەتیی كرێكاران لە هەرێمی كوردستان و پێشكەشكردنی  ئامار و زانیاریی پێشوەچوونەكان لەمبارەیەوە و  پێشكەشكردنی ڕاسپاردە و پێشنیارەكان.

لەلایەکی دیکەوە: چاوەڕوان دەکرێت دوای کۆبوونەوەکە مەسرور بارزانی میکانیزمی دابەشکردنی مووچە ئاشكرا بکات. ئاڤا زانیویەتی بە داهاتی ناوخۆ مووچەی مانگی پێنج دابەش دەکرێت.