سووریا دەستگیرکردنی بکەرانی تەقینەوەی کەنیسەکەی دیمەشی ڕاگەیاند

ئاڤا نیوز
 
وەزارەتی ناوخۆی سووریا ڕایگەیاند، ئەو شانە "تیرۆرستییە"ی سەر بە ڕێکخراوی داعش کە لەپشت تەقینەوەکەی کەنیسەی مار ئیلیاسەوە بوو لە گەڕەکی دویلعەی دیمەشق، بەتەواوی هەڵوەشێندراوەتەوە. وتەبێژی وەزارەتەکە ئاشکرای کرد کە شانەکە پلانیان بۆ ئەنجامدانی هێرشێکی خۆکوژیی دووەمیش دانا بوو.

 

ڕاگەیێنراوی فەرمی: لە کۆنگرەیەکی ڕۆژنامەوانیدا، نورەدین ئەلبابا، وتەبێژی وەزارەتی ناوخۆ، ڕایگەیاند "لەسەر بنەمای زانیاریی سەرەتایی و بە هەماهەنگی لەگەڵ دەزگای هەواڵگریی گشتی، یەکە ئەمنییەکانمان لە دەوروبەری دیمەشق ئۆپەراسیۆنێکیان ئەنجامدا و پاش دەستگیرکردنی یەکێک لە ئەندامانی شانەکە، ناوبراو دانی بە شوێنی حەشارگەکانی هەموو ئەندامانی تردا ناوە، کە بووە هۆی هەڵکوتانە سەریان و دەستگیرکردنی تەواوی شانەکە و دەستبەسەرداگرتنی چەک و تەقەمەنییەکانیان."

 

٠ ئەلبابا ناسنامەی سەرۆکی شانەکەی ئاشکرا کرد کە کەسێکی سوورییە بە ناوی "محەممەد عەبدولئیلا ئەلجمیلی"، ناسراو بە "ئەبو عیماد ئەلجمیلی"، کە پێشتر بە "والی بیابان"ی داعش ناسرا بوو.

 

٠ هەروەها ئاماژەی بەوەدا کە دوو خۆکوژەکە، کە یەکێکیان تەقینەوەکەی کەنیسەکەی ئەنجامدا و ئەوی دیکەیان لە ڕێگای ئەنجامدانی تەقینەوە لە مەقامی سەیدە زەینەب دەستگیرکرا، هاووڵاتی سووری نین و لە کەمپی هۆلەوە هاتوونەتە دیمەشق.

 

وتەبێژی وەزارەتی ناوخۆ جەختی کردەوە کە ئەم ئۆپەراسیۆنە "گورزێکی کوشندە" بوو لە داعش لە دیمەشق و دەورووبەری و ڕایگەیاند کە ڕێکخراوەکە هەوڵی "دروستکردنی بۆشایی ئەمنی و تێکدانی سەقامگیری" دەدات.

 

باکگراند: ڕۆژی یەکشەممە 2025-6-22، بە سوود وەرگرتن لە پشووی هەفتەی مەسیحییەکان و کۆبوونەوەیان لە کەنیسە، خۆکوژێک خۆی کرد بەناو نوێژخوێنانی کەنیسەی مار ئیلیاس لە ناوچەی دوەیلعە لە دیمەشق و خۆی تەقاندەوە، بەگوێرەی ئامارەکانی تەندروستیی سووریا لە ‌هێرشەکەدا 25 کەس کوژراون و 63 کەسی دیکەش برینداربوون.