بانکی ڕافیدەین پێدانی قەرزی بۆ چەند توێژێک دەستپێکردەوە

ئاڤا نیوز

بانکی ڕافیدەین خەرجکردنی گوژمەیەکی نوێی قەرزی دەستپێشخەری "ریاده"ـی بۆ گەنجان و قوتابییان ڕاگەیاند، هاوکات دەستپێکردنەوەی قەرزی نوێی بۆ فەرمانبەران بە قیستی مانگانەی گونجاو ئاشکرا کرد.

چیرۆکی سەرەکی: ڕۆژی چوارشەممە 2025-06-25، بانکی ڕافیدەین، بە مەبەستی ڕەخساندنی هەلی کار بۆ گەنجان، قوتابییان، دەرچووانی زانکۆ و پەیمانگەکان، گوژمەیەکی نوێی قەرزی دەستپێشخەری "ریادە" خەرج کرد.

ڕاگەیێنراوی فەرمی: لە ڕاگەیێنراوێکدا بانکی ڕافیدەین ڕایگەیاند:  لە دەسپێکی گوژمەی نوێی قەرزی دەستپێشخەری، 95 کەس سوودمەند بوون و پێشتر لە رێگەی ئەپلیکەیشنی بانکی ڕافیدەینەوە رێکارەکانی پێشکێشکردنیان جێبەجێ کردووە و سەرجەم مەرجەکانیشیان تێدابووە.

زانياریی زياتر: بەپێی ڕێنماییەکانی بانکی ڕافیدەین، ئەو بڕە پارەیەی وەک قەرزی دەستپێشخەری "ریاده" دەدرێتە هەر سوودمەندێک لە نێوان یەک ملیۆن بۆ 20 ملیۆن دیناری عێراقییە، بە ڕێژەی سوودی 2% لە ساڵێکدا، و ماوەی قەرزەکەش 10 ساڵە .

لەلایەکی دیکەوە: نوسینگەی ڕاگەیاندنی بانکی ڕافیدەین بڵاوی کردەوە: : فەرمانبەرانی کەرتی گشتی دەتوانن سوودمەندبن لە قەرزی بانکەکە، بە جۆرێک هەر فەرمانبەرێک مووچەی بنەڕەتی لە 500 هەزار دینار زیاتر بێت، پێشینەیەکی 10 ملیۆن دیناری پێدەدرێت، ئەو فەرمانبەرەشی کە مووچە بنەڕەتییەکەی لە 500 هەزار دینار کەمتر بێت، پێشینەی پێنج ملیۆن دیناری پێدەدرێت.

ئەمەش بزانە:  ماوەی قەرزەکە 60 مانگە و قیستی قەرزی 10 ملیۆن دیناری مانگانە 241 هەزار دینارە و پێنج ملیۆن دیناریش مانگانەکەی 120 هەزار دینارە، قەرزەکەش تەنیا ئەو فەرمانبەرانە دەگرێتەوە کە مووچەکانیان لە بانکی ڕافیدەین تەوتین کراوە.