لەکاتی بە ئەلیکترۆنیکردنی پسووڵەی خۆراک پارە لە هاووڵاتیان وەردەگیرێت؟

ئاڤا نیوز

لە دوایین مۆڵەتی بە ئەلیکترۆنیکردنی پسووڵەی خۆراک، هەر کەسێک مامەڵەکانی نەکردبێت ئەوا بڕی 11 هەزار دیناری لێ وەردەگیرێت.

وێنە گەورەکە: لە مانگەکانی داهاتوو پسووڵەی خۆراکی هاووڵاتیان لە سەرانسەری کوردستان و عێراق بەئەلیکترۆنی دەکرێت، لەم چوارچێوەیەشدا هەرێمی کوردستان خاوەنی پێنج ملیۆن و 385 هەزار و 820 پسووڵەی خۆراکە.

لێدوانی فەرمی: سیامەند قادر نانەکەلی، بەڕێوەبەری ڕێکخستنی پسوولەی خۆراکی هەولێر بە ئاڤای ڕاگەیاند: لە 5-7-2025، هەر کەسێک مامەڵەی بە ئەلیکترۆنیکردنی فۆرمی خۆراکی نەکردبێت، ماوەیەک پسووڵەی بەشە خۆراکەکەی ڕادەگیرێت، پێویستە چاوەڕێی کاراکردنی خزمەتگوزارییەکان بکات کە ڕەنگە لە سێ مانگی داهاتوودا بگاتە کوردستان.

ئەوەی پێویستە بیزانیت: ئەو کەسانەی لە 5-7-2025 فۆرمەکانیان بە ئەلیکترۆنی نەکردووە، لەگەڵ منداڵانی تازە لە دایکبوو و ئەوانەشی لە ئەوروپا دەگەڕێنەوە، بۆ پرکردنەوە و بە ئەلیکترۆنیکردنی فۆرمی خۆراک بڕی 11 هەزار دیناریان لێ وەردەگیرێت، 10 هەزار دینار وەک مامەڵەی سیستمە نوێیەکە، هەزار دیناریش وەک هەڵمەتی نیشتمانی.

ئەمەش بزانە: هەڵمەتی نیشتمانی مەبەست لێی کۆکردنەوەی پارە و بەکارهێنانییەتی لە ناوچە هەژارنشینەکانی عێراق، وەک دروستکردنی قوتابخانە و نەخۆشخانە و خزمەتگوزارییەکانی دیکە.