ژمارەیەك كۆنگرێسمان كار بۆ قەدەغەكردنی زیرەكی دەستكردی چین دەكەن

ئاڤا نیوز

ژمارەیەك كۆنگرێسمانی هەردوو پارتەكەی ئەمریكا، بەڵێن دەدەن سیستمی زیرەكی دەستكردی چینی لە دەرەوەی دامەزراوە فیدراڵییەكانی وڵات بهێڵنەوە.

چیرۆكی سەرەكی: گرووپێك لە ئەندامانی ئەنجوومەنی نوێنەرانی ئەمریكا لە هەردوو پارتی دیموكراتەكان و كۆمارییەكان، لەڕێگەی پرۆژە یاسایێكەوە هەوڵدەدەن زیرەكیی دەستكرد (AI)ـی بەرهەمهێنراوی چین، لە دامەزراوە حكومییەكانی ئەمریكا قەدەغە بكەن و تەنها كۆمپانیا تایبەتەكان بۆیان هەبێت مامەڵەی پێوە بكەن.

ئەوەی پێویستە بیزانیت: ئەمریكا لە كێبڕكێی زاڵبوون بەسەر چین لە بواری زیرەكی دەستكرد، پلانێكی تۆكمەی داڕشتووە، سەرەتای پیادەكردنی پلانەكەش ئەوەیە بواری بەكارهێنانی زیرەكی دەستكردی چین لە ناوخۆی ئەمریكا بەرتەسك بكاتەوە.

لێدوانی فەرمی: جۆن مۆلینار، نوێنەری پارتی کۆمارییەکان لە لیژنەی کاروباری چین، لە دەستپێكی دانیشتنێک لەسەر ئەو پرسە ڕایگەیاند: ئەمریكا لە شەڕێکی ساردی نوێدایە و زیرەکی دەستکردیش تەکنەلۆژیای ستراتیژیی سەرەکییە. "ڕەنگە هاوسەنگی هێز لە ئاییندەدا پەیوەست بێت بەوەی كام لایەن وەک پێشەنگی پێشبڕکێی AI دەردەکەوێت."

پەیوەست بەم بابەتە: كۆبوونەوەی كۆنگرێسی ئەمریكا، دوای پێنج مانگ دێت لە ناساندنی مۆدێلێکی AI کە هەریەك لە کۆمپانیای ئۆپن ئەی و پلاتفۆرمی گووگڵ لە ڕووی کارایی بوارەكە، ڕکابەری دەكەن، بەڵام تێچووی بەرهەمهێنانی لە وڵاتی چین زۆر كەمترە بەراورد بەو نرخەی كۆمپانیاكانی دیكەی بواری بەرهەمهێنانی زیرەكی دەستكرد پێشتر ڕایانگەیاندبوو.