هێزە عێراقییەکان دوو بەرپرسی باڵا داعش لە سنووری کەرکووک دەکوژن

ئاڤا نیوز

 

فەرماندەیی ئۆپەراسیۆنە هاوبەشەکان، کوژرانی دوو بەرپرسی باڵای ڕێکخراوی داعشی لە سنووری پارێزگای کەرکووک لەسەر دەستی هێزەکانی دژەتیرۆر لە ئۆپەراسیۆنێکی تایبەتدا ڕاگەیاند.

 

وێنە گەورەکە: ئەگەرچی وەزارەتی بەرگریی عێراق لە 9ـی ئەم مانگە، پاککردنەوەی تەواوەتی دۆڵی زغێتونی لە سنووری ئۆپەراسیۆنەکانی کەرکووک، لە دەست داعش ڕاگەیاند. بەڵام وادیارە شانە نوستووەکانی ئەو ڕێکخراوە لە چالاکییەکانیان بەردەوامن.

 

ڕاگەیێنراوی فەرمی: بەپێی ڕاگەیەندراوێکی فەرمی کە لەلایەن فەرماندەیی ئۆپەراسیۆنە هاوبەشەکانەوە دەرچووە، ئۆپەراسیۆنەکە لە ناوچەی "دۆڵی زغێتون" و لەسەر بنەمای زانیاریی هەواڵگریی ورد ئەنجامدراوە. ئاماژەی بەوە کردووە کە بۆسەکە دوای چاودێری و بەدواداچوونێکی وردی چوار ڕۆژە دانراوە.

 

چی ڕوویدا: لە ئەنجامی ئۆپەراسیۆنەکەدا، دوو چەکداری داعش کوژراون کە یەکێکیان بە ناوی (والی ڕیاز) و ئەوی دیکەیان بە (بەرپرسی سەربازیی ڕیاز) ناسراون.

 

لەهەمان کاتدا: هەر لەم ئۆپەراسیۆنەدا، هێزەکانی دژەتیرۆر توانیویانە دەست بەسەر چەک و جبەخانە و چەندین کەرەستە و ئامێری دیکەی چەکدارانی داعشدا بگرن.