هۆشدارییەک لە ڕاوێژکارێکی ئابووریی سوودانیەوە: جێگیریی بازاڕی نەوت کاتییە

ئاڤا نیوز

 

ڕاوێژکاری ئابووریی سەرۆکوەزیرانی عێراق دەڵێت، هەرچەندە ئاگربەستەکەی نێوان ئیسرائیل و ئێران جێگیریی بازاری نەوتی لێکەوتووەتەوە، بەڵام ئەم جێگیریەش کاتییە، جەختیش دەکاتەوە لەوەی کەمی خواست و ناکۆکی ناو ئۆپیک پڵەس کاریگەری نەرێنییان لەسەر بەهای نەوت دەبێت.

 

وێنە گەورەکە: دوای 12 ڕۆژ لە جەنگێکی فراوانی نێوانیان، ئیسرائیل و ئێران بەنێوەندگیریی ئەمریکا ڕۆژی 24ی حوزەیران ئاگربەستیان ڕاگەیاند، جەنگەکە کاریگەری زۆری لەسەر بازاری نەوت دروستکرد و هەڕەشەی تاران بە داخستنی گەروی هوورمز بازاری نەوتی شڵەژاند.

 

لێدوانی فەرمی: مەزهەر محەممەد ساڵح، ڕاوێژکاری سەرۆکوەزیرانی عێراق بۆ کاروباری ئابووری ڕایگەیاند، هەرچەندە بەهۆی ئاگربەستەوە نرخی نەوت دابەزیووە و ئێستا تاڕادەیەک نرخەکەی جێگیربووەتەوە، بەڵام ئەوەش کاتییە و ئەگەر چارەسەری دیپلۆماسی سەرنەگرێت، سەرلەنوێ پێشبینی ناجێگیریی بازاڕی نەوت دەکرێت.

 

وتیشی، ئەگەر جەنگیش نەبێت، بازاری نەوت بە کەمبوونەوەی خواست و ناکۆکییەکانی ناو وڵاتانی بەرهەمهێنەری نەوت کاریگەر دەبێت، لەگەڵ ئەوەشدا عێراق پابەندە بە بنەما داراییەکان کە لە یاسای بوجەدا جێگیرکراون، ئەویش بریتیین لە کەمکردنەوەی خەرجی بۆ کەمترین ئاست و قەرزکردن لەناوخۆدا ئەگەر پێویست بوو، بەجۆرێک خەرجییە بنەڕەتییەکان و وەبەرهێنان بەردەوام بن و کاریگەرییان لەسەر دروست نەبێت.