کۆشکی سپی: کاردەکەین بۆ ئەوەی پەیوەندیمان لەگەڵ ئێراندا هەبێت

ئاڤا نیوز

ئەمریکا جەخت لەوە دەکاتەوە کە بەرنامەی ئەتۆمی ئێرانیان لە ناوبردووە، ئیدارەی ترەمپیش دەیەوێت پەیوەندییان لەگەڵ ئێراندا هەبێت.

وێنە گەورەکە: دانوستانەکانی نێوان ئەمریکا و ئێران لەبارەی بەرنامە ئەتۆمییەکەی تاران بەردەوامی دەبێت و ئەمریکا کۆمەڵێک مەرجی ئامادەکردووە کە دەیەوێت لە زووترین کاتدا لەسەر مێزی گفتوگۆ ڕادەستی شاندی ئێرانی بکەن و جێبەجێ بکرێن.

لێدوانی فەرمی: کارۆلاین لیفیت، وتەبێژی کۆشکی سپی ڕایگەیاند، لەگەڵ ستیڤ ویتکۆف، نوێنەری ڕۆژهەڵاتی ناوەڕاست قسەی کردووە و ئیدارەی ترەمپ بەردەوامە لەوەی پەیوەندییەکی نزیکی لەگەڵ ئێرانییەکان و وڵاتانی نێوەندگیری وەک قەتەر هەبێت.

زانیاریی زیاتر: بە وتەی وتەبێژی کۆشکی سپی، ئەوان دەیانەوێت دڵنیابن لەوەی لەگەڵ ئێرانییەکان دەگەنە خاڵێک کە ڕازی ببن یۆرانیۆم نەپیتێنن و بەرنامەیەکی ئەتۆمی مەدەنیان هەبێت، وە زۆر داواکاری دیکەش هەن کە ئەمریکا هەیەتی.

لەلایەکی دیکەوە: سەرەتای ئەم هەفتەیە ویتکۆف ڕایگەیاند، ئەمریکا هیوادارە بتوانن ڕێککەوتنێکی ئاشتی درێژخایەنی لەگەڵ ئێراندا هەبێت.