شوانێک بەهۆی تەقینەوەی مین لە سنووری سیدەکان گیانی لەدەست دا

ئاڤا نیوز

 

بەرەبەیانیی ئەمڕۆ شەممە گەنجێکی تەمەن 24 ساڵ بەناوی عوسمان سدیق کە پیشەی شوان بوو بەهۆی تەقینەوەی مین لە سنووری سیدەکان گیانی لەدەست دا.

 

وێنە گەورەکە: ئەمڕۆ شەممە 28-6-2025، گەنجێک کە پیشەی شوان بووە، دانیشووی گوندی خۆرانە لە دەشتی هێرتێ لە سنووری قەزای سیدەکان، لە کاتی لەوەڕاندنی مەڕوماڵات لە کوێستانەکانى سەروکە لە سنوورى سیدەکانى ناوچەى برادۆست، مین پێیدا دەتەقێتەوە و گیان لەدەست دەدات.

 

لێدوانی فەرمی: عەلی میران، بەڕێوەبەری گشتیی تەکنیکی لە دەزگای مین بە ئاڤا میدیای ڕاگەیاند، ئەو شوێنەی ئەو گەنجە بۆی چووە دەکەوێتە کوێستانەکانى سەروکە لە سنوورى سیدەکانى ناوچەى برادۆست، ناوچەیەکی قەدەغەکراوە، تیمەکانمان پێشتریش هۆشداریان بە هاووڵاتیان داوە و سمیناریان کردووە کە ئەم شوێنە ترسناکن و بەتەواوی پاک نەکراونەتەوە، بەداخەوە هەندێک کەس گوێ بە ڕێنماییەکان نادەن و ئەم ڕووداوانەی لێدەکەوێتەوە.

لەلایەکی دیکە: بەڕێوەبەری گشتیی تەکنیکی لە دەزگای مین دەڵێت، لەسەرەتای ساڵەوە تا ئەمڕۆ 24 کەس بەهۆی مینەوە لە هەرێمی کوردستان گیانیان لەدەست داوە، هاوکات لە سەرەتای ئەمساڵەوە لە سنووری ئیدارەی سۆران نۆ هاووڵاتی بەرمین کەوتوون، پێنج کەسیان گیانیان لەدەست داوە و چوار کەسیش بریندار و کەمئەندام بوون.

 

زانیاریی زیاتر: بەپێی قسەی کەسە نزیکەکانی ئەو شوانەی ئەمڕۆ بەهۆی تەقینەوەی مین گیانی لەدەست دا، گەنجەکە دوو مانگ لەمەوبەر ژنى مارەبڕیوە و بڕیاربووە بەم زووانە بیگوازێتەوە، بەڵام قەدەر نەیهێشتووە بە دەستگیرانەکەی بگات.

 

ئەوەی پێویستە بیزانیت: ئەو ناوچەی لە سنووری سیدەکان کە مینی لێیە ناوچەی قەدەغەکراوە و پێشتر خەڵکەکەی شوێنەکانیان چۆڵکردووە، دواتر چەکدارانی پەکەکە ڕێگەیان نەدەدا خەڵکەکە بگەڕێنەوە، بەڵام دوای پرۆسەی ئاشتی چالاکییەکانی پەکەکە لە سنوورەکە کەمبۆتەوە هاووڵاتیانیش دوور لە ڕێنماییەکانی دەزگای مین دەچنەوە ناوچەکانیان، بەهۆیەوە ڕووداوی نەخوازراوی لێدەکەوێتەوە.