لە دوو ڕۆژدا هەر مسقاڵێک زێڕ 12 هەزار دینار دابەزیوە

ئاڤا نیوز

 

لەگەڵ دەستپێكی جەنگی نێوان ئیسرائیل و ئێران، نرخی زێڕ بەرچاو بەرز بووەوە و لەگەڵ وەستانیشی، ڕۆژ بە ڕۆژ زێڕ نرخەكەی زیاتر دادەبەزێت و لە دوو ڕۆژدا هەر مسقاڵێك 12 هەزار دینار دابەزیوە.

 

وێنە گەورەكە: ئەمڕۆ شەممە 28-6-2025، نرخی مسقاڵێك زێڕی عەیار 21، بە 648 هەزار دینارە، ئەمە لە كاتێكدایە كە ڕۆژی پێنجشەممەی ڕابردوو نرخەكەی نزیكەی 660 هەزار دینار بوو.

لێدوانی فەرمی: دانا وەرتی، گوتەبێژی سەندیکای زێڕنگەرانی هەولێر بە ئاڤا میدیای ڕاگەیاند: لەگەڵ دەستپێكی جەنگی نێوان ئیسرائیل و ئێران، نرخی مسقاڵێك زێڕ تاوەكو 710 هەزار دینار بەرز بووەوە، بەڵام ئێستا نرخەكە دابەزیوە، پێشبینیش دەكرێت تاوەكوو ناوەڕاستی ئەم هەفتەیە نرخی مسقاڵێك زێڕی عەیار 21 بۆ 640 هەزار دابەزێت، ئەمە لە كاتێكدا ئەگەر جەنگ دەستپێنەكاتەوە بەڵام لەگەڵ هەر شەڕ و ئاڵۆزییەك بێگومان نرخی زێڕ بەرز دەبێتەوە.

 

هۆكارە زانراوەكان: بەپێی گوتەی، گوتەبێژی سەندیكای زێڕنگەرانی هەولێر، دابەزینی نرخی زێڕ چەند هۆكارێكی هەیە ئەمانەی خوارەوەن:-

 

- سەرۆكی بانكی فیدڕاڵیی ئەمریكا ڕایگەیاند كە ئەگەری هەڵئاوسان هەیە هەر لە ئەمەش ڕێژەی سووی دانەزاند ئەمەش كاریگەری بۆ دابەزینی نرخی زێڕ هەبوو و تاوەكوو دوو تا سێ مانگی دیكەیش كاریگەرییەكەی بەردەوام دەبێت.

 

- دۆناڵد ترەمپ، سەرۆكی ئەمریكا ڕایگەیاند كە لەگەڵ هەریەك لە وڵاتانی چین و كەنەدا ڕێككەوتوون و گرفتەكانی نێوانیان چارەسەر دەكەن.

 

- وەستانی جەنگی نێوان ئیسرائیل و ئێرانیش هۆكارێكی دیكەیە.