سەرۆك بارزانی ئاڵوگۆڕی نامەكانی لەگەڵ سەركردەكانی عێراق بڵاودەكاتەوە

ئاڤا نیوز

 

سەرۆك بارزانی ئاڵوگۆڕی نامەكانی لەگەڵ سەركردە عێراقییەكان و هەزار لاپەڕە لەسەر ساڵانی ڕووخانی ڕژێمی سەددام و داعش بڵاودەكاتەوە.

 

چیرۆكی سەرەكی: دوای چەندین ساڵ لە وردبینی و پێداچوونەوە تا دەگاتە وەرگێڕانی بۆ سەر زمانی عەرەبی، بەرگی شەشەمی کتێبی "بارزانی و بزووتنەوەی ڕزگاریخوازی کورد" كە لەلایەن سەرۆك مەسعود بارزانی نووسراوە، چاپ و بڵاوکرایەوە.

 

بابەتە ستراتیژییەكە: تایبەتمەندی ئەو بەرگەی زنجیرە كتێبی "بارزانی و بزووتنەوەی ڕزگاریخوازی کورد" كە جیای دەكاتەوە لە سەرجەم بەرگەكانی پێش خۆی ئەوەیە؛ پەیوەندیی ڕاستەوخۆی بە ڕووداوەكانی ئێستای عێراق و ناوچەكەوە هەیە، بەو پێیەی سەرۆك بارزانی بە وردی و ڕاشكاوی ڕووداوەكانی نێوان ساڵانی ڕووخانی ڕژێمی سەددام حوسێن تا دەگاتە بڕیاری خەڵكی كوردستان بۆ سەربەخۆیی، باسكردووە.

- هەروەها بۆ یەکەمجار نزیکەی 300 لاپەڕەی نامە و دەستنووسەكانی سەرۆك بارزانی لەگەڵ سەرکردە عێراقی و نێودەوڵەتییەکان لە ماوەی هەستیارترین قۆناغەکانی دامەزراندنی سیستمی سیاسیی عێراق ئاشکرا دەکات.

 

زانیاریی زیاتر: بەرگی شەشەم لە دوو بەش پێکهاتووە کە کۆی گشتیی زیاتر لە هەزار لاپەڕەیە، چاپی یەکەمی لەلایەن دەزگای خێرخوازیی بارزانییەوە بڵاوکرایەوە.

ئەمەش بزانە: بەگوێرەی سەرچاوەیەک لە بارەگای بارزانی، دابەشکردنی ئەم چاپە تەنیا لە زانکۆ و ناوەندەکانی توێژینەوە و کتێبخانەی گشتی و دەزگای چاپ و بڵاوکردنەوەی ئەلمەدا و میدیاکاندا سنوردار دەبێت. چاپی دووەم چاپ دەکرێت و بە شێوەیەکی بەرفراوانتر لە ڕێگەی چاپخانە و کتێبخانەکانەوە لە هەرێمی كوردستان و شارەكانی دیكەی عێراق دەخرێتە بەردەست.