ئەحمەد رێكانی 50 ملیۆن دینار پێشكێشی زیانڤێكەفتیێن دهۆكێ کر

ئاڤا نیوز

ئێک ژ کەسایەتیێن هەولێرێ  د کەمپینا کۆمکرنا هاریکاریان دا 50 ملیون دیناران، پێشکێشی زیانڤێکەفتیێن دهۆکێ کر.

داخۆیانیا فەرمی: ئەحمەد رێکانی، سەرۆکێ ئێکەتیا وەبەرهێنانێ ل هەرێما کوردستانێ بو ئاڤا نیوز دیارکر؛ کەمپینەکا کۆمکرنا هاریکاریان بۆ زیانڤێکەفتیێن دهۆکێ ل هەولێرا پایتەختێ هەرێما کوردستانێ ژلایێ دەستەیا وەبەرهێنانا حکومەتا هەرێما کوردستانێ دەستپێکریە و ئەوان ژی خواست پشکداریێ د وێ کەمپینێ دا بکەت.

زانیاریێن زێدەتر: ئەحمەد رێکانی ئاماژە ب وێ چەندێ دا 50 ملیون دینار وەک هاریکاری بۆ زیانڤێکەفتیێن لەهیا دهۆکێ پێشکێشی دەستەیا وەبەرهێنانا دهوکێ کرنە و ژڤانە ل رۆژێن بهێت گۆژمەکێ مەزن یێ پارەی کو ژلایێ کەسایەتیێن دیار ل هەرێما کوردستانێ ڤە هاتینە کۆمکرن، بۆ زیانڤێکەفتیێن دهۆکێ بهێنە پێشکێشکرن.

باکگراوەند: ل 19 ڤێ هەیڤێ، بەشەک ژ تاخێن دهۆکێ کەفتنە بەر پێلەکا لەهیێ" زێدەتر ژ 100 خێزان تووشی زیانێن مەزن یێن ماددی بوون، حکومەتا هەرێما کوردستانێ ژی ئەڤرۆ 117 شوقە بۆ وان خێزانان پێشکێشکرن یێن کو خانیێن وان بن ئاڤ بووین و جهێن جودا جودا ژی دەست ب کۆمکرنا هاریکاریان بۆ زیانڤێکەفتیان کریە.