هەرێمی كوردستان بەرەو كشتوكاڵی زیاتر و عێراقیش بەرەو وشكەساڵی

ئاڤا نیوز

عێراق بەرەو وشکەساڵی دەڕوات بەهۆی ئەوەی زۆرینەی زەوییە تەرخانکراوەکانی بۆ کشتوکاڵ کەڵکیان نەماوە؛ بەراورد بەوەش لە هەرێمی کوردستان و بەپشتبەستن بە وەزارەتی کشتوکاڵی هەرێم، دۆخی زەوییە کشتوکاڵییەکان لەوپەڕی باشیدان.

وێنە گەورەکە: بەپشتبەستن بە وەزارەتی کشتوکاڵی عێراق لە کۆی 51 ملیۆن دۆنم زەوی تەرخانکراو بۆ کشتوکاڵ، تەنیا 24 ملیۆن دۆنم کەڵکی کشتوکاڵی ماوە، بەراورد بەمە وەزارەتی کشتوکاڵ و سەرچاوەكانی ئاوی هەرێمی کوردستان ئاشکرای کردووە، هیچ زەوییەک لە کوردستان دووچاری وشکبوونەوە و لەناوچوونی بەرهەمەکان نەبووەتەوە و دۆخیان بۆ کشتوکاڵ لەوپەڕی باشیدایە.

لێدوانی فەرمی: هیوا عەلی، گوتەبێژی وەزارەتی کشتوکاڵ و سەرچاوەكانی ئاوی هەرێمی کوردستان بۆ ئاڤا نیوز گوتی: لە هەرێمی کوردستان نۆ ملیۆن و 937 هەزار و 769 زەوی بۆ کشتوکاڵ تەرخان کراون؛ بەپێی ئەو سەرژمێریانەی لەلایەن وەزارەتی کشتوکاڵەوە كراون هیچ کام لەو زەوییە تەرخانکراوانە کێشەیان تێدانییە و دووچاری وشکبوونەوە نەبوونەتەوە.

لەلایەکی دیکەوە: پێشووتر عەلی حەموود شەممەری، بەرێوەبەری گشتیی فەرمانگەی زەوییە کشتوکاڵییەکان لە وەزارەتی کشتوکاڵی عێراق ڕایگەیاندبوو: 51 ملیۆن دۆنم ڕووبەری زەوی لە عێراق بۆ کشتوکاڵ تەرخانکراوە، بەهۆی وشکەساڵییەوە تەنیا 24 ملیۆن دۆنم بەکەڵکی کشتووکاڵ ماوە.