ئێران: هەلومەرج گونجاو نییە بۆ دەستپێکردنەوەی دانوستان لەگەڵ ئەمریکا

ئاڤا نیوز

لەبارەی دەستپێکردنەوەی دانوستانی نێوان ئێران و ئەمریکا، نوێنەری هەمیشەیی ئێران لە نەتەوەیەکگرتووەکان ئاشكرای دەکات بۆ ئێستا هەلومەرجەکان گونجاو نین.

وێنە گەورەکە: دوای ڕاگرتنی جەنگی نێوان ئیسرائیل و ئێران، هەوڵە ناوچەیی و نێودەوڵەتییەکان، بە تایبەت ئەمریکا بەردەوامن بۆ دەستپێکردنەوەی دانوستانەکان لەگەڵ ئێران و ڕازیکردنی ئەو وڵاتە بۆ گەڕانەوە بۆ سەر مێزی گفتووگۆ لەبارەی بەرنامە ئەتۆمییەکەی.

لێدوانی فەرمی: ئەمیر سەعید ئیراوانی، باڵیۆز و نوێنەری هەمیشەیی ئێران لە نەتەوە یەکگرتووەکان بە تۆڕی CBS NEWSـی ئەمریکی ڕایگەیاند، بۆ ئەم کاتە مەرجەکان گونجاو نین بۆ دەستپێکردنەوەی دانوستان لەگەڵ ئەمریکا. ئەگەر ئەمریکییەکان بیانەوێت مەرجەکانیان بەسەر ئێمەدا بسەپێنن، دانوستان لەگەڵ ئەوان مەحاڵە.

زانیاریی زیاتر: دوای ڕاگرتنی جەنگی ئێران و ئیسرائیل، دۆناڵد ترەمپ، سەرۆکی ئەمریکا جەختی لەوەکردەوە ئەگەر ئێران بیر لە بەرنامە ئەتۆمییەکەی نەکاتەوە، لە هەفتەی داهاتوو 'واتە ئەم هەفتەیە'، شاندێکی واشنتن لەگەڵ بەرپرسانی تاران گفتوگۆ دەکەن و ڕەنگە ڕێککەوتنێک واژۆ بکەن.

باکگراوند: لە میانەی ئامادەکارییکردن بۆ گەڕی شەشەمی دانوستانەکانی نێوان ئێران و ئەمریکا لە 2025-06-23، ئیسرائیل بە ئامانجی ڕێگرییکردن لە هەڕەشە ئەتۆمییەکانی ئێران، ئۆپەراسیۆنێکی سەربازی بۆ سەر تاران دەستپێکرد، دواتریش ئەمریکا ‌هێرشێکی بۆ سەر بنکە ئەتۆمییەکانی ئێران لەوانەش فۆردۆ و نەتەنز و ئەسفەهان ئەنجامدا.