مالیکی بۆ سەرۆک بارزانی: کێشەکان چارەسەر دەکەین

ئاڤا نیوز

 

سەرۆکی هاوپەیمانی دەوڵەتی یاسا ئاشکرای کرد، سەرۆک بارزانی داوایکردووە بەپێی دەستور مامەڵە لەگەڵ هەرێمی کوردستان بکرێت، ئەویش دووپاتی  کردووەتەوە کە کێشەکان چارەسەر دەکرێن.

لێدوانی فەرمی: نووری مالیکی، سەرۆکی هاوپەیمانی دەوڵەتی یاسا لە چاوپێکەوتنێکدا لەگەڵ سۆمەریە نیوز ڕایگەیاند: ڕژێمی پێشوو گرێبەستێکی لەگەڵ هەرێمی کوردستان و وڵاتانی دراوسێی بۆ بەجێهێشتین کە نەمانتوانی بەسەریدا زاڵ بین و چارەسەری بکەین.

زانیاریی زیاتر: سەرۆک بارزانی بە نووری مالیکی گوتووە " دەبێت لە چوارچێوەی دەستوور مامەڵە لەگەڵ هەرێمی کوردستاندا بکرێت". مالیکی دەڵێت "دووپاتم کردەوە پابەندین بەو ڕێککەوتنە" بارزانیش دووپاتیکردەوە "چاوەڕێی لێکدانەوە و پێداچوونەوەیە بۆ بڕیارەکانی دادگەی فیدراڵی عێراق". 

ئەوەی پێویستە بیزانیت: "سەرۆک بارزانی پێی وایە هەندێک بڕیار دەست بەسەر مافی کورددا دەگرن، ناکرێت گەلی کورد پەراوێز بخرێت و ڕۆڵی نا دیدە بگیرێت، بەڵام ئەم کێشانە بەم زووانە چارەسەر دەبن". سەرۆکی هاوپەیمانی دەوڵەتی یاسا وای گوتووە.

 

وێنە گەورەکە: 18 ی ئاداری ئەمساڵ، پارتی دیموکراتى کوردستان بەیاننامەیەکی بڵاوکردەوە و  ناڕەزایی خۆی دەربڕی لە شێوازی هەڵبژاردنەکانی پەڕلەمانی کوردستان و هەڕەشەی کشانەوەی لە پڕۆسەی سیاسی عێراق کرد، دوو ڕۆژ دواتر شاندێکی ئەمریکا سەردانی سەرۆک بارزانییان کرد. لە کۆبوونەوەکەدا سەرۆک بارزانی گوتوویەتی "پارتی بایکۆتی هەڵبژاردنی نەکردووە، بەڵکو لەگەڵ هەڵبژاردنێکی پاک و بێگەرد و شەفافە".