یەکێتی لە نەینەوا عەرەبێک دەکاتە سەرۆک لیست

ئاڤا نیوز

بۆ هەڵبژاردنەکانی داهاتووی پەرلەمانی عێراق، لایەنە سیاسییەکان لیستی کاندیدانیان پێشکەشکردووە، پارتی و یەکێتی بە لیستی جیا لە ناوچە کوردستانییەکانی دەرەوەی ئیدارەی هەرێمی کوردستان بەشداری دەکەن، یەکێتی لە بازنەی نەینەوا عەرەبێکی کردووەتە سەرۆکی لیستەکەی.

وێنە گەورەکە: بڕیارە لە 11ـی 11ـی ئەمساڵ هەڵبژاردنەکانی پەرلەمانی عێراق بەڕێوەبچێت و کۆمیسیۆنیش بەردەوامە لە ئامادەکارییەکان، حیزب و لایەنە سیاسییەکانیش لیستی کاندیدەکانیان پێشکەش بە کۆمیسیۆن کردووە.

لێدوانی فەرمی: غەیاس سورچی، بەرپرسی ڕاگەیاندنی مەڵبەندی یەکێتی لە مووسڵ بە ئاڤای گوت، "یەکێتی لەگەڵ حیزبی ڕەفعەی نیشتمانی و ژماریەک کەسایەتی، هاوپەیمانی یەکێتی خەڵکی نەینەوای داناوە، سەرۆکی لیستەکەی عامر حەدیدییە، عەرەبە و ڕەزامەندیمان داوە بەوەی وەک سەرۆک لیست دابنرێت."

زانیاریی زیاتر: بازنەی نەینەوا لە 31 کورسی پێکدێت، ژمارەی کورسی لایەنە کوردستانییەکان لەنێوان نۆ بۆ 11 کورسییە کە بەسەر پارتی و یەکێتییدا دابەش دەبن.

باکگراوند: لە هەڵبژاردنی خولی پێنجەمی پەرلەمانی عێراق ساڵی 2021، یەکێتیی نیشتمانی کوردستان، 26 هەزار و 316 دەنگی هێنا و یەک کورسی لە پارێزگای نەینەوا بەدەستهێنا.