بە هەزاران هاووڵاتی سووریا کوردستان جێدەهێڵن

ئاڤا نیوز

دوای دوو هەفتە لە بڕیارەکەی حکومەتی هەرێمی کوردستان بۆ هاوکاریکردنی ئەو ئاوارانەی سووریا کە نایانەوێت ماوەی نشینگە (ئیقامە) نوێ بکەنەوە و لە سزای بەسەرچوونی ئیقامەش دەبەخشرێن، زیاتر لە دوو هەزار هاووڵاتی ڕۆژئاوای کوردستان و سووریا لەو بڕیارە سوودمەندبوون، بەشێوەی ئارەزوومەندانەش هەرێمی کوردستانیان جێهێشتووە و بۆ وڵاتی خۆیان گەڕاونەتەوە.

وێنە گەورەکە: لە 15ی ئەم مانگەوە حکومەتی هەرێمی کوردستان کارئاسانی بۆ سەرجەم ئاوارە سوورییەکان کرد کە لە ماوەی 60 ڕۆژدا، ئەوانەی ماوەی نشینگە (ئیقامە)یان بەسەرچووە دەتوانن بەبێ سزای دواکەوتن نشینگەکانیان نوێ بکەنەوە، ئەوانەشی ئیقامەیان نوێنەکردووەتەوە و دەیانەوێت بگەڕێننەوە، لە سزای نوێنەکردنەوەی ئیقامە دەبەخشرێن و بۆ گەڕانەوەشیان بۆ سووریا ئاسانکارییان بۆ دەکرێت.

لێدوانی فەرمی: سەردار ئیسماعیل، وتەبێژی بەڕێوەبەرایەتی پاسپۆرتی هەولێر دەڵێت، بڕیارەکە هاوکارییەکی مرۆییە تا سوورییەکان بتوانن بەبێ هیچ کێشە و ئاستەنگییەک بگەڕێننەوە وڵاتی خۆیان.

خاڵی ئەرێنیی: چەندین ساڵ بوو ئاوارەکانی سووریا کە ژمارەیان بە 250 هەزار کەس لە هەرێمی کوردستان دەخەمڵێنرێت و زۆرینەیان لە کامپەکان لە دۆخێکی سەختدا دەژیان، بەهۆی نوێنەکردنەوەی ئیقامە و کەڵەکەبوونی سزای پێبژاردنەوە لە دوو دڵی زۆردابوون، بەڵام بڕیارەکەی حکومەت کارئاسانیی بۆ گەڕانەوە و چارەسەری ئەو کێشەیەیان دەکات.

لەلایەکی دیکەوە: نوور محەممەد، ئاوارەیەکی سوورییە و بۆ کەناڵی حەدەسی سعودی باسی لەوەکردووە، "بڕیارەکە بۆ ئێمە وەک موعجیزە بوو، چونکە بەهۆیەوە ژمارەیەک سزای پێبژاردنمان لەسەر نەما کە ساڵانێک بوو بەهۆیەوە مەحاڵ بوو بتوانین هەرێمی کوردستان جێبهێڵین."

عەبدووڵاش ئاوارەیەکی دیکەی سوورییە و پێنج ساڵ لەمەوبەر بەهۆی ترسی لە دەسەڵاتی بەشار ئەسەد، وڵاتەکەی بەرەو کوردستان جێهێشتووە و سێ ساڵ بوو ئیقامەی نوێنەکردبووەوە، ئەو بۆ هەمان کەناڵ ئاماژەی بەوەداوە، بەهۆی کێشەکان و پێبژاردنی داراییەوە نەیدەویست بۆ سووریا بگەڕێتەوە، چونکە ترسی ئەوەی هەبوو لەکارتی ڕاییکردنی مامەڵەکاندا کێشەی بۆ دروستببێت، بەڵام بەهۆی بڕیارەکەوە ئێستا دەتوانێت بۆ سووریا بگەڕێتەوە.