ئاژانسی بلومبێرگ: عێراق دەیەوێت هەناردەی نەوتی هەرێمی كوردستان دەستپێبكاتەوە

ئاڤا نیوز

ئاژانسێکی ئەمریکی ئەوەی ئاشکرا کردووە، حکومەتی عێراق تاوتوێی دەستپێکردنەوەی هەناردەی نەوتی هەرێمی کوردستان دەکات، بۆ ئەوەش دەیەوێت تێچووەکەی یەکلایی بکاتەوە.

زانیاریی بەدەستهاتوو: بەگوێرەی ڕاپۆرتێکی ئاژانسی بلومبێرگی ئەمریکی ئەو گۆڕانکارییە ڕێگە بە بەرهەمهێنەرانی نەوتی هەرێمی کوردستان دەدات، دەست بە بەرهەمهێنان بکەنەوە لە ڕێگەی بەندەری جەیهانی تورکیاوە، بەو پێیەی داخستنی بۆری تورکیا بووە هۆی زیانی ملیاران دۆلار لە داهاتی حکومەت و کۆمپانیا پەیوەندیدارەکان.

هۆکارە زانراوەکان: یەکێک لە ئاستەنگە سەرەکییەکانی بەردەم دەستپێکردنەوەی هەناردەکردنەوەی نەوت، تێچووی بەرهەمهێنانی نەوتی کوردستانە، کە دەکاتە 21 دۆلار بۆ هەر بەرمیلێک.

لێدوانی فەرمی: حەیان عەبدولغەنی، وەزیری نەوتی عێراق لەمبارەیەوە گوتی: هەوڵدەدەین بە زووترین کات یەکلاییکردنەوەی پرسی تێچوون خێراتر بکەین و هەناردەکردن دەستپێبکەینەوە.

 

باكگراوند: نزیكەی ساڵێكە هەناردەی نەوتی هەرێمی كوردستان، بەهۆی بڕیارێكی دادگەی نێوبژیوانی پاریس ڕاگیراوە، لەوكاتەوە حكومەتی هەرێمی كوردستان و عێراق لە گفتوگۆدان بۆ دەستپێكردنەوەی.