قوباد تاڵەبانی: گەشبینین لە ماوەیەکی نزیکدا لەگەڵ بەغدا لەسەر مووچە ڕێکبکەوین

ئاڤا نیوز

قوباد تاڵەبانی لەمیانی کۆبوونەوەی لەگەڵ باڵیۆزی فەرەنسا لە عێراق، باسی لە دوایین گفتوگۆکانی نێوان هەولێر و بەغدا کرد و دەڵێت، گەشبینن لە ماوەیەکی نزیکدا لەبارەی مووچە و شایستە داراییەکانی هەرێمی کوردستان بگەنە ڕێککەوتن.

وێنە گەورەکە: هەفتەیەکە هەردوو حکومەتی عێراق و کوردستان بە بەشداریی کۆمپانیا نێودەوڵەتییەکانی نەوت ئەوانەی لە کەرتی نەوتی کوردستان کار دەکەن، بەچڕی دەستیان بە گفتوگۆ کردووە لەبارەی هەناردەکردنەوەی نەوت و چارەسەرکردنی کێشەی مووچەی خەڵکی کوردستان. دوای سەردانی شاندێکی عێراق بۆ هەولێر، چەند ڕۆژێکە شاندێکی حکومەتی کوردستان لە بەغدایە و تاوەکو ئێستا لە گفتوگۆکردن بەردەوامن. بەپێی زانیارییەکانی ئاڤا ڕێککەوتنی سەرەتاییان کردووە و نزیکن لە واژۆکردنی ڕێککەوتنی کۆتایی.

ڕاگەیێنراوی فەرمی: بەپێی ڕاگەیێنراوێکی نووسینگەکەی، قوباد تاڵەبانی، جێگری سەرۆکوەزیرانی هەرێمی کوردستان ئەمڕۆ لەگەڵ پاتریک دۆرێل، باڵیۆزی فەرەنسا لە عێراق کۆبووەتەوە و باسیان لە دوایین بەرەوپێشچوونەکانی گفتوگۆکانی نێوان هەولێر و بەغدا کردووە.

قوباد تاڵەبای ڕایگەیاندووە: "گفتوگۆکانی نێوان شاندە دانوستانکارەکانی هەولێر و بەغدا لە چەند ڕۆژی ڕابردوودا بە ئەرێنی بەڕێوەچوون و گەشبینین لە ماوەیەکی نزیکدا بگەینە ڕێککەوتن و کێشەی مووچەی فەرمانبەرانی هەرێمی کوردستان چارەسەر بکرێت.

قوباد تاڵەبانی دووپاتی دەکاتەوە هەرێمی کوردستان لە هیچ هەوڵێک درێغی ناکات بۆ ڕێککەوتن لەگەڵ بەغدا و دابینکردنی ماف و شایستە داراییەکانی هاووڵاتیانی هەرێمی کوردستان".

لەلایەکی دیکەوە: هه‌رێم كه‌مال ئاغا، سه‌رۆكی فراكسیۆنی یه‌كێتی له‌ پەرلەمانی عێراق به‌ ماڵپەڕی فەرمی حیزەکەی ڕاگەیاندووە، كۆبوونه‌وه‌كانی نێوان هەولێر و به‌غدا بۆ چاره‌سه‌ركردنی كێشه‌ی مووچه‌ هه‌نگاوی باشی بڕ‌یوه‌. دەشڵێت : "هیوامان هه‌یه‌ له‌ ماوه‌یه‌كی نزیكدا ئه‌و كێشه‌یه‌ چاره‌سه‌ر بكرێت، چونكه‌ لێكتێگه‌یشتنی باش له‌نێوان هه‌ردوولادا هه‌یه‌".