بە ژمارەیەک مووشەک هێرش دەکرێتە سەر کەرکووک

ئاڤا نیوز 

 

کارگێڕیی فڕۆکەخانەی کەرکووک ڕایگەیاند: بە سێ مووشەک هێرشکراوەتە سەر فڕۆکەخانەی نێودەوڵەتیی کەرکووک و کارمەندێکی ئەمنی فڕۆکەخانەکە بە سووکی برینداربووە.

 

زانیاریی پەیامنێر: دیار محەممەد، پەیامنێری ئاڤا میدیا لە كەركووك ڕایگەیاند: كەمێك پێش ئێستا بەشێك لە دانیشتووانی شاری كەركووك دەنگی دوو تەقینەوەی گەورەیان بیستووە، تەقینەوەكان بریتین لە دوو مووشەك كە یەكێكان لە لە گەڕەكی عرووبە و ئەوی دیكەیان لەنزیك فڕۆكەخانەی كەركووك بەر زەوی كەوتوون و هیچ زیانێكی گیانیان لێ نەكەوتووەتەوە.

 

ڕاگەیێنراوی فەرمی: کارگێڕیی فڕۆکەخانەی نێودەوڵەتیی کەرکووک لە ڕاگەیێنراوێکدا ڕایگەیاند:  کاتژمێری 11:30 خوولەک، سێ مووشەک ئاراستەی شاری کەرکووک کراوە و دوو لەو مووشەکانە لە نزیک دەرگای سەربازیی فڕۆکەخانەکە کەوتوونەتە خوارەوە و مووشەکێکی دیکەش لە نزیک دەرگای چوونە ژوورەوەی مەدەنی کەوتووەتە خوارەوە و بەهۆیەوە ئاگرێک کەوتووەتەوە، بەڵام خۆشبەختانە هیچ زیانێکی گیانی نەبووە، تەنها کارمەندێکی سکورێتی بە سووکی برینداربووە. 

 

٠ مووشەکێک لەسەر ماڵێکی گەڕەکی عرووبە کەوتووەتە خوارەوە کە دوو ئەندامی ئەو خێزانە خاوەن پێداویستیی تایبەتن بەڵام هەموویان سەلامەتن و زیانی گیانی نەبووە، تەنها زیانەکە ماددیە. 

٠ لەبارەی ڕاگرتنی گەشتە ئاسمانییەکانی فڕۆکەخانەی کەرکووکەوە دیار محەممەد، ڕایگەیاند: گەشتە ئاسمانییەکانی فڕۆکەخانەکە ڕانەگیراون و هیچ ڕاگەیێنراوێک لەوباریەوە نییە. 

 

لێدوانی فەرمی: سەرچاوەیەك لە پۆلیسی كەركووك زانیارییەكانی بۆ ئاڤا میدیا پشتڕاست كردەوە و ڕایگەیاند: هێزە ئەمنییەكان سەرقاڵی بەدواداچوون و كۆكردنەوەی زانیارین.

 

لەلایەکی دیکەوە: ڕێبوار تەها، پارێزگاری کەرکووک لە کۆنگرەیەکی ڕۆژنامەوانیدا ڕایگەیاند، ئەمشەو بە مووشەکی کاتیوشا هێرشکراوەتە سەر کەرکووک و یەکێک لە کاتیوشاکان کەوتووەتە سەر ماڵێک لە گەڕەکی عرووبە و خۆشبەختانە هیچ زیانێکی گیانی نەبووە.