ئەنجوومەنی وەزیرانی عێراق لە کۆبوونەوەدایە؛ "پرسی مووچە تاوتوێ دەکرێت"

ئاڤا نیوز

بەبەشداریی وەزیرەکانی پارتی، ئەنجوومەنی وەزیرانی عێراق لەکۆبوونەوە دایە و چاوەڕێ دەکرێت یەکێک لە تەوەرەکانی کۆبوونەوەکە، بڕیاردان بێت لەسەر ناردنی مووچەی مانگی ئایاری فەرمانبەرانی هەرێمی کوردستان.

 

وێنە گەورەکە: دوای گفتوگۆ و دانوستانەکانی چەند ڕۆژی ڕابردووی نێوان هەولێر و بەغدا و ڕێککەوتن لەسەر بەشێکی سەرەکی لە وردەکارییەکان، چاوەکان لەسەر کۆبوونەوەی ئەمڕۆی ئەنجوومەنی وەزیرانی عێراقن تا بڕیار لە ناردنی مووچە بدات، هەر بەوهۆکارە و دوای مانگێک لە بایکۆتی دانیشتنەکانیش، وەزیرەکانی پارتی لەکۆبوونەەی ئەمڕۆی حکومەتدا بەشدارییان کردووە.

ڕاگەیێنراوی فەرمی: نووسینگەی سەرۆکوەزیرانی عێراق بڵاویکردەوە، بەسەرۆکایەتی محەممەد شیاع سوودانی، سەرۆکوەزیران کۆبوونەوەی ئاسایی ئەنجوومەنی وەزیرانی عێراق دەستیپێکردووە.
 
زانیاریی لە پەیامنێرەوە: دەروون مەلا ناجی، پەیامنێری ئاڤا میدیاش لە بەغدا ڕایگەیاند، هەرچەندە لە کارنامەی کۆبوونەوەکەدا بابەتی مووچە نەهاتووە، بەڵام دەکرێت لەسەر پێشنیازی وەزیرەکان ئەم بابەتەش بۆ کۆبوونەوەکە زیاد بکرێت و بڕیاری لەسەر بدرێت، چاوەڕێش دەکرێت کۆبوونەوەکە لەبارەی مووچەوە "ئەنجامی باشی هەبێت".

 

لەلایەکی دیکەوە: شێروان دووبەردانی، ئەندامی فراکسیۆنی پارتی لە پەرلەمانی عێراق ڕایگەیاند: شاندی هەرێمی کوردستان شەوی ڕابردوو گەڕاوەتەوە هەولێر و ڕێککەوتنێک کراوە کە ئەمڕۆ لە کۆبوونەوەی ئەنجوومەنی وەزیرانی عێراق بابەتی ڕێککەوتنی نێوان هەولێر و بەغدا باس بکرێت، هاوکات پێشبینی دەکرێت هەر ئەمڕۆ لەو کۆبوونەوەیە دا بڕیار لە تەمویلکردنی مووچەی فەرمانبەرانی هەرێمی کوردستان بۆ مانگی پێنج بدرێت.