ئەنجوومەنی وەزیرانی كوردستان لەبارەی مووچە و پرسی نەوت كۆدەبێتەوە

ئاڤا نیوز

ئەنجوومەنی وەزیرانی هەرێمی کوردستان تاوتوێی پرسی مووچە و نەوت و دەرئەنجامی کۆبوونەوەی هەردوو شاندەکەی حکومەتی هەرێمی کوردستان و عێراق دەكات.

وێنە گەورەکە: لە چەند ڕۆژی ڕابردوو شاندێكی وەزارەتی دارایی عێراق لە هەرێمی كوردستان بوون و لەگەڵ بەرپرسانی باڵای وەزارەتی دارایی گفتوگۆی وردیان كرد سەبارەت بە پرسی مووچە و نەوت و پاشانیش شاندێكی هەرێمی كوردستان چوونە بەغدا و چەند كۆبوونەوەیەكی گرنگیان لەگەڵ بەرپرسانی بەغدا ئەنجام دا و شەوی ڕابردوو كۆبوونەوەكانیان كۆتایی هات گەڕانەوە شاندی هەرێمی كوردستان، ئەنجامی سەرجەم ئەو كۆبوونەوانە دەبردرێتە نێو هۆڵی كۆبوونەوەی ئەنجوومەنی وەزیران و بە وردی تاوتوێ دەكرێت و بڕیاریشیان لەبارەیەوە دەدرێت.

زانیاریی تایبەت: بەپێی زانیارییەكانی ئاڤا میدیا، سبەی چوارشەممە 1-7-2025، ئەنجوومەنی وەزیرانی هەرێمی كوردستان بە سەرپەرشتیی سەرۆكوەزیران مەسرور بارزانی كۆدەبێتەوە.

لێدوانی فەرمی: سەرچاوەیەكی باڵا لە ئەنجوومەنی وەزیران بە ئاڤا میدیای ڕاگەیاند، وا بڕیارە لە كۆبوونەوەكەی سبەی ئەنجوومەنی وەزیران تاوتوێی ناوەڕۆك و ئەنجامی كۆبوونەوەكانی چەند ڕۆژی ڕابردووی نێوان شاندەكانی هەرێمی كوردستان و عێراق بكرێت، هاوكات پرۆسەی هەناردەكردنەوەی نەوت و مووچەی فەرمانبەرانی هەرێمی كوردستان و داهاتی ناوخۆ بە وردی باسیان لێوە دەكرێت.

زانیاریی بەدەستهاتوو: بەپێی زانیارییەکانی ئاڤا لە چەند کاتژمێری داهاتوودا مەسرور بارزانی و سوودانی پەیوەندییەکی تەلەفۆنی دەکەن. بەم زووانەش ئەنجامی تەلەفۆنەکە و ئەنجامی گفتوگۆکانی هەردوو شاند بۆ ڕای گشتی ڕادەگەیەنرێت.