ئەمریکا: ئێران ئامادەکاری بۆ مینڕێژکردنی گەرووی هورمز کردووە

ئاڤا نیوز

دوو بەرپرسی ئەمریکی ڕایدەگەیێنن، سوپای ئێران مانگی ڕابردوو مینی دەریایی بارکردووەتە سەر کەشتییەکانی لە کەنداوی فارس، ئەمەش هەنگاوێک بووە کە نیگەرانییەکانی لە واشنتن زیاتر کردووە لەوەی کە تاران خۆی ئامادە دەکات بۆ گەمارۆدانی گەرووی هورمز.

لێدوانی فەرمی: ئەو دوو بەرپرسە ئەمریکییە بە ئاژانسی ڕۆیتەرزییان ڕاگەیاندووە، ئەو ئامادەکارییانەی پێشتر ڕانەگەیێنرابوون و لەلایەن هەواڵگریی ئەمریکاوە ئاشکرا کراون، ماوەیەک دوای ئەوە ڕوویانداوە کە ئیسرائیل لە 13ی حوزەیران یەکەم هێرشی مووشەکیی خۆی دژی ئێران ئەنجامدا.

ئاماژەیان بەوەشکردووە، ڕەنگە ئێرانییەکان مینەکانیان ئامادە کردبێت بۆ باوەڕپێهێنانی واشنتن کە تاران لە داخستنی گەرووەکەدا جدییە، بەڵام بەبێ ئەوەی نیازی جێبەجێکردنی هەبێت.

زانیاریی زیاتر: دەزگا هەواڵگرییەکانی ئەمریکا لە ساڵی 2019دا خەمڵاندبووی، کە ئێران زیاتر لە پێنج هەزار مینی دەریایی هەیە کە دەتوانرێت بە یارمەتیی بەلەمی بچووک و خێرا بەخێرایی دابنرێن.

لەلایەکی دیکەوە: کەشتیگەلی پێنجەمی ئەمریکا کە بنکەکەی لە بەحرەینە، ئەرکی پاراستنی بازرگانیی لە ناوچەکەدا لە ئەستۆیە. هێزی دەریایی ئەمریکا بە شێوەیەکی گشتی چوار کەشتیی دژەمین لە بەحرەین و لە نزیک گەرووی هورمز هێشتووەتەوە.

ئەوەی پێویستە بیزانیت: نزیکەی یەک لەسەر پێنجی بارە نەوت و گازە جیهانییەکان بە گەرووی هورمزدا تێدەپەڕن و سعوودیە، ئیمارات، کوەیت، و عێراق تەنانەت ئێرانیش زۆربەی نەوتی خاوی خۆیان لەڕێگەی گەرووەکەوە هەناردە دەکەن، وڵاتی قەتەریش کە یەکێکە لە گەورەترین هەناردەکارانی گازی سروشتیی لە جیهاندا، نزیکەی هەموو گازەکەی لە ڕێگەی گەرووەکەوە دەنێرێت.