لقەکانی بانکی ڕافیدەین مووچەی چەکدارانی حەشدی شەعبی دابەش دەکەن

ئاڤا نیوز

سەرچاوەیەک لە حکومەتی عێراق ڕایدەگەیێنێ، کە لقەکانی بانکی ڕافیدەین بەشدار کراون لە پرۆسەی دابەشکردنی مووچەی چەکدارانی حەشدی شەعبی، ئەمەش ڕۆژێک دوای ڕاگەیاندنی دەستپێکردنی پرۆسەکەیە.

 

وێنە گەورەکە: 28ـی ئەم مانگە فەرماندە باڵاکانی حەشدی شەعبی و پەرلەمانتارانی عێراق ئاشکرایان کرد، کە بەهۆی ترس لە سزاکانی ئەمریکا، ئەو کۆمپانیا تایبەتەی کارتی بانکی بۆ ئەندامانی حەشد دروستکردبوو لە پرۆسەکە کشاوەتەوە و  بەوهۆیەش دابەشکردنی مووچە ڕاگیراوە، بەڵام دواتر دەستەی حەشدی شەعبی چارەسەرکردنی کێشەکەی ڕاگەیاند.

 

زانیاریی بەدەستهاتوو: بەگوێرەی سەرچاوەکە کە قسەی بۆ میدیای عێراق کردووە، "مووچەی ئەندامانی حەشدی شەعبی لە لقەکانی بانکی ڕافیدەین دابەش دەکرێت، دوای ئەوەی پێشتر پرۆسەی دابەشکردنەکە تەنها لە چەند بنکەیەکی تایبەتدا بوو".

 

زانیاریی زیاتر: بەگوتەی سەرچاوەکە: "لقەکانی بانکی ڕافیدەین خراونەتە ناو پرۆسەی دابەشکردنی مووچەی ئەندامانی حەشدەوە، ئەمەش بەپێی بڕیارێکی حکومییە بۆ کەمکردنەوەی قەرەباڵغی لەسەر بنکەکان".

 

ئەوەی پێویستە بیزانیت: ڕۆژی سێشەممە قەرەباڵغی و ڕیزی درێژی چەکدارانی دەستەکە لە بنکەکانی مووچەوەرگرتن دروست بوو، ژمارەیەکی زۆریان نەیانتوانی مووچەکانیان وەربگرن، بەهۆی ڕەتکردنەوەی کارتەکانیانەوە، پێش ئەوەی ژمارەیەکیان بتوانن پارەکەیان بە کاش وەربگرن.