عێراق داوا لە تورکیا دەکات ڕێکارەکانی نیشتەجێبوون بۆ عێراقییەکان ئاسان بکات و دیپۆرتیان نەکاتەوە

ئاڤا نیوز

سەرۆکی ئەنجوومەنی نوێنەرانی عێراق، داوای لە بەرپرسانی تورکیا دەکات ڕێکارەکانی نیشتەجێبوون و نوێکردنەوەی مافی نیشتەجێبوون بۆ هاووڵاتیانی عێراقی ئاسان بکەن و هەوڵی چارەسەرکردنی کێشەکانیان بدەن دیپۆرتیان نەکەنەوە، مەگەر سەرپێچییەکی یاسایی ئەنجام بدەن کە ببێتە هۆی دەرکردنیان.

چیرۆکی سەرەکی: چوارشەممە 2025-07-02، دکتۆر مەحموود مەشهەدانی، سەرۆکی ئەنجوومەنی نوێنەرانی عێراق، لە ئەنقەرەی پایتەختی تورکیا، لەگەڵ هاکان فیدان، وەزیری دەرەوەی ئەو وڵاتە کۆبووەوە و چەندین دۆسیەی گرنگی هاوبەشیان تاوتوێ کرد.

ڕاگەیێنراوی فەرمی: بەپێی ڕاگەیێنراوێکی نووسینگەی ڕاگەیاندنی سەرۆکی ئەنجوومەنی نوێنەران، لە کۆبوونەوەکەدا مەشهەدانی جەختی لەسەر پێویستیی پتەوکردنی پەیوەندییە دووقۆڵییەکانی نێوان هەردوو وڵات کردووەتەوە، بە شێوەیەک کە شایستەی هەردوو گەلی دۆست بێت، هاوکات داوای کردووە لیژنەکانی دۆستایەتیی نێوان هەردوولا زیاتر لە ئێستا کارا بکرێن.

لە هەمان کاتدا: یەکێک لە تەوەرە سەرەکییەکانی کۆبوونەوەکە، داواکاریی سەرۆکی پەرلەمانی عێراق بوو لە بەرپرسانی تورکیا بۆ ئاسانکردنی ڕێکارەکانی مانەوە و نوێکردنەوەی نیشتەجێبوون (ئیقامە) بۆ هاووڵاتیانی عێراقی، هەروەها هەوڵ بۆ چارەسەرکردنی کێشەکانیان بدەن و لە دیپۆرتکردنەوەی لەناکاو بیانپارێزن، مەگەر سەرپێچییەکی یاسایی ئەنجام بدەن کە ببێتە هۆی دەرکردنیان.

لەلایەکی دیکەوە: لەسەر پرسی ئاو، مەشهەدانی سوپاسی هەڵوێستی تورکیای کرد بۆ زیادکردنی بەردانەوەی ئاو بۆ ڕووبارەکانی دیجلە و فورات و هیوای خواست ئەم بەردانەوەیە بەردەوام بێت و نەوەستێت.

لە بەرامبەردا: هاکان فیدان، وەزیری دەرەوەی تورکیا، جەختی کردەوە کە "عێراق جێگەی ڕێز و بایەخێکی بەرزی سەرکردایەتیی تورکیایە،" و هیوای سەرکەوتن و گەشەسەندنی بەردەوامی بۆ عێراق و گەلەکەی و سەرکردایەتییەکەی خواست. هەروەها هیوای خواست هەڵبژاردنەکانی داهاتوو بە سەرکەوتوویی بەڕێوەبچن و نوێنەرایەتییەکی ڕاستەقینەی گەلی عێراقی لێبکەوێتەوە.