سەرۆکی نوێی دادگای فیدڕاڵی سوێندی یاسایی دەخوات

ئاڤا نیوز

بڕیارە ئەمڕۆ پێنجشەممە دادوەر مونزیر ئیبراهیم حوسێن، وەک سەرۆکی نوێی دادگای فیدراڵی لەبەردەم سەرۆککۆماری عێراق سوێندی یاسایی بخوات، بەوەش بەفەرمی لە پۆستەکەیدا دەستبەکاردەبێت.

وێنە گەورەکە: 30ـی  مانگی ڕابردوو و دوای ڕۆژێک لە کاندیدکردنی بۆ پۆستی سەرۆکی نوێی دادگای فیدراڵی لەلایەن ئەنجوومەنی باڵای دادوەرییەوە، سەرۆکایەتی کۆماری عێراق مەرسوومی کۆماری بۆ دەستبەکاربوونی سەرۆکی نوێی دادگای فیدراڵی دەرکرد.

زانیاریی پەیامنێر: سەرچاوەیەک لە سەرۆکایەتی کۆماری عێراق بە دەروون مەلا ناجی، پەیامنێری ئاڤا میدیای لە بەغدا ڕاگەیاندووە، "ئەمڕۆ دادوەر مونزیر ئیبراهیم حوسێن وەک سەرۆکی نوێی دادگای فیدڕاڵی مەرسوومی کۆماری بۆ دەستبەکاربوونی پێشکەش دەکرێت".

سەرچاوەکەی سەرۆکایەتی کۆماری عێراق ئاماژەی بەوەشکردووە، هەر ئەمڕۆ سەرۆکی نوێی دادگای فیدڕاڵی لەبەردەم لەتیف ڕەشید، سەرۆککۆمار سوێندی یاسایی دەخوات و بەفەرمی دەستبەکار دەبێت.

لێدوانی فەرمی: هاوڕێ تۆفیق، بەڕێوەبەری فەرمانگەی پەیوەندییەکان و ڕێکخراوە نێودەوڵەتییەکان لە سەرۆکایەتیی کۆمار، بە ئاڤا میدیای ڕاگەیاند، "دانیشتنەکانی دادگای باڵای فیدراڵی هەفتەی ئایندە دەستپێدەکەنەوە"، ئاماژەی بەوەش کرد "پێش دەستلەکارکێشانەوەی ئەندامانی دادگا بڕیار بوو دۆسیەی مووچەی فەرمانبەرانی هەرێمی کوردستان تاوتوێ و فەرمانێکی وەلائی بۆ دەربكرێت، بۆیە یەکەم دانیشتنی دادگاكە لەسەر ئەم پرسە دەبێت".