کتێبی 'مارەکانی هەرێمی کوردستان' بڵاو دەکرێتەوە

ئاڤا نیوز

بۆ یەکەمجار کتێبێکی تایبەت بە مارەکانی هەرێمی کوردستان چاپ دەکرێت و نووسەرانی کتێبەکەش دەڵێن، ئامانجمان پاراستنی سەلامەتیی خەڵکە و ئاشنابوونە بە مارەکانی کوردستان و جەختکردنەوەیە لە گرنگی و پاراستنیان.

چیرۆکی سەرەکی: چەند توێژەرێکی ناوخۆیی و دەرەکی کتێبێکی تایبەتیان بە جۆر و ژیانی ئەو مارانە چاپکردووە، کە لەنێو سروشتی کوردستاندا دەژین. کتێبەکە بەناونیشانی " مارەکانی هەرێمی کوردستانی عێراق"ـە و بە زمانی کوردی و ئینگلیزی نووسراوە و لە دەزگایەکی نێودەوڵەتیی بواری خشۆکەکان (Chimaira) لە وڵاتی ئەڵمانیا چاپکراوە.

لێدوانی فەرمی: سۆران حەمەعەلی، یەکێک لە نووسەرانی کتێبەکە بە ئاڤای ڕاگەیاند: کتێبەکە زانیاریی وردی لەسەر ئەو مارانە تێدایە، کە لە کوردستان هەن یان پێشبینی دەکرێت لە داهاتوودا بدۆزرێنەوە و ژمارەیان 41 جۆر دەبێت، هاوکات باس لە دوو جۆر مارمێلکەی بێ قاچیش کراوە، کە زۆرجار بە هەڵە وەک مار دەناسرێنەوە.

زانیاریی زیاتر: بەپێی کتێبەکە لە نێو ئەو مارانەی تا ئێستا تۆمار کراون، تەنیا سێ جۆریان ژەهرەکەیان کوشندەیە و مەترسییان لەسەر مرۆڤ هەیە، لەو سێ جۆرەش تەنیا جۆرێکیان لە ناوچەکانی کوردستان بەربڵاوە و مەترسیدارە.

پێدراوە ڕاستییەکان: لەنێو کتێبەکەدا باس لە چەند جۆرێکی مار کراوە، کە تایبەتن بە ناوچەی زاگرۆس و لە هیچ ناوچەیەکی دیکەی جیهاندا نادۆزرێنەوە وەکو " ماری زێبرای زاگرۆسی".