هەرێمی کوردستان بۆ خەرجکردنی مووچە چاوەڕوانی بڕیاری سوودانییە

ئاڤا نیوز

لەبارەی خەرجکردنی مووچە، هەرێمی کوردستان چاوەڕوانی بڕیاری سوودانییە، حکومەتی هەرێمی کوردستان ئامادەیە دەست بە هەناردەکردنەوەی نەوت بکاتەوە و کێشەی نییە، مەسرور بارزانی تەنیا یەک مەرج و داواکاری هەیە، بەشی ناوخۆ زۆر بێت بۆ ئەوەی قەیرانی سووتەمەنی سەرهەڵنەدات.

زانیاریی ئاڤا: ئاڤا زانیویەتی لەسەر پرسی هەناردەکردنەوەی نەوت هەولێر و بەغدا  ڕێککەوتوون و حکومەتی هەرێمی کوردستان ئامادەیە دەست بە هەناردەکردنەوەی نەوت بکرێتەوە، هەر برێک کە بەغدا دەیەوێت.

زانیاریی بەدەستهاتوو: لەبارەی نەوت مەسرور بارزانی، سەرۆکوەزیرانی کوردستان پێداگرە لەسەر ئەوەی نابێت بەشی ناوخۆی هەرێمی کوردستان کەمبێت و کاریگەری هەبێت لەسەر بەرزبوونەوەی نرخی سووتەمەنی، بەنزین و گاز و بابەتەکانی دیکە و گرانی لە ناوخۆی کوردستان دروست بێت، ئەمە تاکە داواکاری و مەرجی هەرێمی کوردستانە.

زانیاریی زیاتر: لەبارەی کاتی هەناردەکردنەوەی نەوت هەرێمی کوردستان لەسەر بڕیاری سوودانی وەستاوە، هەر کات بڕیار لەبارەی هەناردەکردنییەوە بدات، هەرێمی کوردستان قوفڵی بۆرییەکان دەکاتەوە و دەست بە هەناردەکردنی نەوت دەکرێتەوە.

هاوکات لەبارەی مووچە، هەرێمی کوردستان چاوەڕوانی وەڵامی کۆتایی سوودانییە بۆئەوەی بینێرێت، چونکە هەرێمی کوردستان لەسەر بەڵێنی سوودانی هەموو پابەندییەکانی لەبارەی نەوت جێبەجێ کردووە.

لەلایەکی دیکەوە: کۆمپانیا نێودەوڵەتییەکانی نەوت، بەتایبەت کۆمپانیا ئەمریکییەکان خۆیان لەگەڵ حکومەتی عێراق قسەیان کردووە. باڵیۆزی ئەمریکاش خۆی لەگەڵ حکومەتی عێراق لەسەر خەتە و دوێنێش ئەمریکا بەتووندی هۆشداری دا کە چیتر قبووڵی ناکەن بە دواخستنی نەوتی هەرێمی کوردستان.