دەنگێکی بەهێز لە هەولێر بیسترا و کونسوڵخانەی ئەمریکا زەنگی ئاگادار کردنەوە لێدەدات

ئاڤا نیوز

 

کەمێک پێش ئێستا دەنگی تەقینەوەیەکی بەهێز لە نزیک فڕۆکەخانەی نێودەوڵەتیی هەولێر بیسترا و بەهۆیەوە گەشتەکانی فرۆکەخانەکە ڕاگیران.

ئەوەی لەبارەیەوە دەگوترێت: دانیشتوویەکی کۆمەڵگەی سێبیران لە نزیک فڕۆکەخانەی هەولێر بە ئاڤای گوت: درۆنێک لە نزیک بنکەی هاوپەیمانان کەوتووەتە خوارەوە.

لێدوانی فەرمی: دانا تۆفیق، بەرێوەبەری گشتیی فڕۆکەخانەی نێودەوڵەتیی هەولێر بەوەکاڵەت بە ئاڤا میدیای ڕاگەیاند: گەشتەکانی فڕۆکەخانەی نێودەوڵەتیی هەولێر ئاسایی کرایەوە و گەشتەکان  دەستپێکردووە، بەهۆی ڕووداوەکە تەنیا یەک فڕۆکەی فلای ئەربیل کاتی دابەزینی دواخرا، ڕووداوەکە هیچ زەرەر و زیانێکی بۆ فڕۆکەخانە نەبووە.

 

ڕاگەیێنراوی فەرمی: دژە تیرۆری کوردستان ڕایگەیاند، کاتژمیر 9:58 ئەمشەو لە نزیک فڕۆکەخانەی نێودەوڵەتیی هەولێر، درۆنێکی بۆمبڕێژکراو خرایە خوارەوە.

 

بەپێی ڕاگەیێنراوەکەی دژە تیرۆری کوردستان، بەهۆی خستنەخوارەوەی درۆنەکە خۆشبەختانە هیچ زیانێکی گیانی و ماددی نەبووە.

ئەوەی پێویستە بیزانیت: هەر ئەمشەو لە نزیک فڕۆکەخانەی کەرکووک دەنگێکی بەهێز بیسترا، وێنە و ڤیدیۆ بڵاوکراونەتەوە و دەردەکەوێت تەنێک لەنێوان گەڕەکی بەدر و فڕۆکەخانەی کەرکووک کەوتووەتە خوارەوە، بەڵام تاوەکو ئێستا پشتڕاست نەکراوەتەوە درۆن بووە یان مووشەک بووە.