پەرلەمانتارێک: فرۆشتنی کارتی دەنگدان کاریگەری لەسەر ئەنجامی هەڵبژاردن نابێت

ئاڤا نیوز

هەرچەندە کۆمیسیۆنی باڵای سەربەخۆی هەڵبژاردنەکانی عێراق چەندین جار ڕایگەیاندووە، کە هەر کاندید و لایەنێک مامەڵە بە کڕینی کارتی بایۆمەتری دەنگدانەوە بکات ڕووبەڕووی یاسا دەکرێتەوە، بەڵام ئەندامێکی پەرلەمانی عێراق  دەڵێت، "کڕینی و فڕۆشتنی کارتی دەنگدان بەردەوامە و ئاساییە".

وێنە گەورەکە: بەگوێرەی هەندێک ڕاپۆرتی میدیایی نرخی کارتی دەنگدان گەیشتووەتە 400 هەزار دینار، بەڵام کۆمیسیۆن دەنگۆکان ڕەتدەکاتەوە و هەموو مامەڵەیەکی کڕین و فرۆشتن بە کارتی دەنگدانەوە وەک تاوان لەقەڵەم دەدات.

لێدوانی فەرمی: بورھان نەمراوی، پەرلەمانتاری عێراق لە هاوپەیمانی تەقەدوم، ڕایگەیاند: "فرۆشتنی کارتی دەنگدان کارێکی ئاساییە و بوونی هەیە، بەڵام کاریگەری لەسەر ئەنجامی هەڵبژاردن نابێت".

 

نەمراوی ئاماژەی بەوەکرد، خەڵکی ئەگەر بڕیاری کارت فڕۆشتنیش بدەن، بەڵام دەنگ بەو کاندیدە نادەن کە هەوڵی کڕینی دەنگیانی داوە، پێشتریش ئەمە تاقی کراوەتەوە و دووبارە بووەتەوە.

 

باکگراوند: پێشتر عیماد جەمیل، سەرۆکی تیمی ڕاگەیاندن لە کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاند، کڕینی کارتی دەنگدان بێسوودە چونکە تەنیا خاوەنە ڕاستەقینەکەی دەتوانێت بەکاریبهێنێت بۆیە قورسە یاری پێوەبکرێت، کۆمیسیۆنیش چاودێریی دۆخەکە دەکات و هەر کاندیدێک کڕین و فرۆشتن بەکارتی دەنگدانەوە بکات، ڕووبەڕووی ڕێکاری یاسایی دەبێتەوە و لە کێبرکێی هەڵبژاردن دووردەخرێتەوە.