دەیان هەزار زیارەتکاری عەرەب و بیانی بۆ زیندووکردنەوەی یادی عاشورا لە عێراقن

ئاڤا نیوز

وەزارەتی ناوخۆی عێراق ڕایدەگەیێنێت، دەروازە سنوورییە وشکانی و ئاسمانییەکانی سەرانسەری وڵات، لە ماوەی ڕۆژانی ڕابردوودا، شایەتی هاتنی دەیان هەزار زیارەتکاری عەرەب و بیانی بوون، کە بۆ زیندووکردنەوەی یادی عاشورا لە کەربەلا و مەزارگە و شوێنە پیرۆزەکان هاتوون.

وێنە گەورەکە: ساڵانەی لە سەرەتای مانگی موحەرەم و ڕێوڕەسمەکانی عاشوورا، دەیان هەزار کەس لە شیعە مەزهەبەکانی عێراق و زیارەتكارانی بیانی سەردانی مەزارگەی ئیمام حوسێن لە کەربەلا دەکەن.

ڕاگەیێنراوی فەرمی: بەگوێرەی ڕاگەیێنراوی وەزارەتی ناوخۆ، "هەموو دەزگا ئەمنی و خزمەتگوزارییەکان، تواناکانیان خستووەتەگەڕ بۆ پێشوازیکردن لە زیارەتکاران و ئاسانکاری بۆ هاتنە ژوورەوەیان بە شێوەیەکی ڕەوان، لەگەڵ دابینکردنی ژینگەیەکی ئارام و شایستە بۆ ئەم بۆنە ئایینییە گەورەیە." هەروەها "ڕێکارەکان بە ڕێکوپێکی و بەپێی پلانێکی تۆکمەی پێشوەختە داڕێژراو بەڕێوە دەچن."

لە هەمان کاتدا: وەزارەتەکە ئاماژەی بەوەشکرد، "هەماهەنگی لەنێوان فەرماندەییە ئەمنییەکان، بەڕێوەبەرایەتییەکانی پاسپۆرت و دەروازە سنوورییەکان و فەرماندەییەکانی پۆلیس لە پارێزگا پەیوەندیدارەکان بەردەوامە، بۆ مسۆگەرکردنی ئاسوودەیی هاتووان و دابینکردنی هەموو ئەوەی کە دەبێتە هۆی سەرخستنی مەراسیمەکانی زیندووکردنەوەی عاشوورای ئەمساڵ."

ئەوەی پێویستە بیزانیت: ڕۆژی عاشورا دەکەوێتە دەیەمین ڕۆژی مانگی موحەڕەم، لەنێو موسڵماناندا پیرۆز و گرنگییەکی زۆری هەیە و شیعە مەزهەبەکانیش تێیدا ماتەم دەگێڕن بەوەی "ئیمام حسێن لەو ڕۆژەدا شەهید کراوە".