وادەی ڕاگەیاندنی دابەشکردنی زەوی لە سنووری هەولێر ئاشکرا دەکرێت

ئاڤا نیوز

هەنگاوەکانی دابەشکردنی زەوی لە سنووری شارەوانییەکانی هەولێر خێراتر دەکرێت و ئاڤا میدیا وادەی ڕاگەیاندنی زەوی لەلایەن شارەوانییەکان ئاشکرا دەکات.

چیرۆکی سەرەکی: لە سنووری هەولێر ڕەزامەندیی لەسەر دابەشکردنی نزیکەی 42 هەزار پارچە زەوی دراوە، لەپێناو خێراترکردنی پرۆسەکە و دابەشکردنی پارچە زەوییەکان بەسەر فەرمانبەراندا، بەڕێوەبەرایەتیی گشتیی شارەوانییەکانی هەولێر لە ڕۆژانی پشووشدا کار دەکەن.

لێدوانی فەرمی: مەریوان حاکم هادی، بەڕێوەبەری گشتیی شارەوانییەکانی هەولێر بە ئاڤای ڕاگەیاند: خەریکی جیاکردنەوەی وەزارەتەکانین لە سنووری شارەوانییەکان، تاوەکو بزانین ژمارەی فەرمانبەرانی هەر وەزارەتێک لە سنووری هەر شارەوانییەکدا چەندە، هەروەها بەشێکی زۆری کارەکانی شارەوانییەکانی بەحرکە و بنەسڵاوە تەواو بوون.

زانیاریی زیاتر: لە بنەسڵاوە نزیکەی دوو هەزار 700 پارچە زەوی دابەش دەکرێت، لە بەحرکە نزیکەی دوو هەزار و 200 پارچە زەوی بە فەرمانبەران دەدرێت.

ئەوەی پێویستە بیزانیت: ڕۆژی پێنجشەممە 10-7-2025، وەزیری شارەوانی و پارێزگاری هەولێر لە کۆنگرەیەکی ڕۆژنامەوانیدا ناوی یەکەم شارەوانی لە سنووری هەولێر ئاشکرا دەکەن کە دەست بە دابەشکردنی پارچە زەوی دەکات.

باکگراوند: بە بڕیاری سەرۆکوەزیران مەسرور بارزانی، دابەشکردنی زەوی بەسەر فەرمانبەراندا دەستیپێکرد و نزیکەی 485 هەزار کەس لە سنووری شارەوانییەکاندا لێی سوودمەند دەبن.