فەرمانبەرێکی عێراق بە هۆکاری ئەوەی لەبەر بەڕێوەبەرەکەی هەڵنەستاوە؛ سزا دەدرێت

ئاڤا نیوز

لە پارێزگای بابل کارمەندێکی تەندروستی سزادەدرێت بەهۆی ئەوەی لەبەر بەڕێوەبەرەکەی هەڵنەستاوە کاتێک هاتووەتەژوورەوە، تەندروستی پارێزگاکەش دەڵێت، بڕیارەکە کارگێڕیی نییە و لیژنەی لێکۆڵینەوەیان لەسەر پێکهێناوە.

چیرۆکی سەرەکی: بەگوێرەی نوسراوێکی فەرمی کە مانگی ئایاری ئەمساڵ دەرچووە، بەڕێوەبەری نەخۆشخانەی ئیبن سەیف تایبەت بە منداڵان بڕیاریداوە کارمەندێکی نەخۆشخانەکەی سزابدات، ئەویش بەهۆکاری ئەوەی کاتێک بەڕێوەبەری نەخۆشخانەکە چووەتە ژوورەوە لەسەر کورسییەکەی هەڵنەستاوە، ئەوەش یەکەمجاری نەبووە و پێشتر هەمان کاری کردووە.

لێدوانی فەرمی: جەواد بیرمانی، بەڕێوەبەری فەرمانگەی تەندروستی پارێزگای بابل بە ئاڤا میدیای ڕاگەیاند، نوسراوەکە بەهۆی ئەوەی بە زمانێکی کارگێڕی دروست نەنوسراوە، ئەوان هەڵیانوەشاندووەتەوە و لیژنەیەکیش بۆ لێکۆڵینەوە لەسەر ڕووداوەکە پێکهێنراوە.

لەلایەکی دیکەوە: سەندیکای پەرستارانیش لەسەر ئەو بابەتە هاتووەتە دەنگ و دەڵێت، بڕیارەکە بەکارهێنانی دەسەڵاتە کارگێڕییەکانە بەشێوەیەکی خراپ، داواش لە لایەنە پەیوەندیدارەکان دەکات ڕێکار بگرنەبەر تا ڕووداوی لەو شێوەیە و سزادارانی کارمەندانی تەندروستی بەهۆکاری سەیر دووبارە نەبێتەوە.