ڕۆژنامەیەکی بەریتانی: ئیسرائیل لە جەنگی 12 ڕۆژەی دژی ئێران کۆمەڵێک نهێنی لە هاوڵاتیانی شاردۆتەوە

ئاڤا نیوز

بەگوێرەی ڕۆژنامەیەکی بەریتانی، ئیسرائیل لە ترسی دروستبوونی پشێووی ناوخۆیی کۆمەڵێک نهێنی لە هاوڵاتیانی وڵاتەکەی و میدیاکانی جیهان لەکاتی جەنگی ئێران و ئیسرائیل شاردۆتەوە و ئاشکرای نەکردوون.

 

وێنە گەورەکە: جەنگی ئیسرائیل و ئێران بۆ ماوەی 12 ڕۆژ بەردەوام بوو، لەو ماوەیەدا دەیان هێرش لەڕێگەی سەدان مووشەک و فڕۆکەی بێفڕۆکەوان و فڕۆکەی جەنگیەوە لەلایەن هەردوو وڵاتەکەوە کرایە سەر یەکدی و سەرەڕای بانگەشەی ئێران بۆ بەئامانجگرتی بنکە و پێگە سەرەکییە سەربازییەکانی ئیسرائیل، بەڵام لەلایەن تەلئەبیبەوە زانیارییەکانی تاران ڕەتدەکرایەوە.

 

بڵاوکراوەی فەرمی: بەپێی ڕاپۆرتێكی ڕۆژنامەی تەلەگرافی بەریتانی کۆمەڵێک وێنەی مانگە دەستکردەکان و بەڵگەنامەی لێکۆڵەرانی ئەمریکی لەکاتی جەنگی نێوان ئیسرائیل و ئێران ئەوەیان ئاشکرا کردووە، کە  پێنچ بنکەی سەرەکیی سوپای ئیسرائیل بەر هێرشی مووشەکەکانی ئێران کەوتوون، بەڵام تەلئەبیب ڕێگەی نەداوە ئەو زانیارییانە ئاشكرا بکرێن، بەپێی ڕاپۆرتەکە شەش مووشەکی ئێران ڕاستەوخۆ ئەو بنکانەیان کردۆتە ئامانج کە لە نێویاندا بنکەی سەرەکیی هێزی ئاسمانی، بنکەی کۆکەرەوەی زانیاریی هەواڵگریی سوپا و بنکەی لۆجیستی سەربازی لەلایەن سوپای پاسدارانی ئێرانەوە کراونەتە ئامانج.

 

زانیاریی زیاتر: سوپای ئیسرائیل دوای بڵاوبوونەوەی ڕاپۆرتەکە ڕەتیکردۆتەوە هیچ زانیارییەک سەبارەت بە زەرەر و زیانی ئەو پێگە سەربازییانە بڵاوبکاتەوە و ڕایگەیاندووە، هەموو بنکە و پێگە سەربازییەکانی ئیسرائیل لە کاتی جەنگدا لە ئامادەباشی تەواودا بوون بۆ بەرپەرچدانەوەی هێرشەکان.