ئیتاڵیا گەشە بە ناوچە گوندنشینەكانی كوردستان دەدات

ئاڤا نیوز

هەنگاوەكانی جێبەجێكرنی پرۆژەی (KORES) دەستیپێكرد، بۆ ئەم مەبەستەش حكومەتی هەرێمی كوردستان یاداشتێك لەگەڵ پەیمانگەیەكی نێودەوڵەتیی ئیتاڵی واژۆ دەكات.

چیرۆكی سەرەكی: بە پاڵپشتی پەیمانگەی نێودەوڵەتیی 'سیهام باری'ـی ئیتاڵی، پڕۆژەی 'KORES ' دەستیپێكرد، ستافی ئەكادیمی و تەكنیكی پەیمانگەكە گەیشتوونەتە هەرێمی كوردستان، كاری سەرەكی ستافی پرۆژەكە، پەرەپێدانی بەرهەمی زەیتی زەیتوون و بەكارهێنانی سیستمی پێشكەوتووی باخدارییە، لەپێناو گەشەپێدانی ناوچە گوندنشینەكانی هەرێمی كوردستان و لەلایەن حكومەتی ئیتاڵیاوە پاڵپشتی دارایی و تەكنیكی و ڕاوێژكاری دەكرێت.

ڕاگەیێنراوی فەرمی: وەزارەتی كشتوكاڵ و سەرچاوەكانی ئاوی هەرێمی كوردستان بڵاویكردووەتەوە، ئەمڕۆ یەكشەممە 6ـی تەمموزی 2025، بە بەشداری وەزیری كشتوكاڵ و سەرچاوەكانی ئاوی هەرێمی كوردستان، ئامادەبوونی بەڕێوەبەری گشتیی باخداری و دارستان و پاوان، هەروەها ژمارەیەك خاوەن پرۆژەی كشتوكاڵی و جووتیاران، وۆركشۆپێك بە بەشداری ستافی تەكنیكی پەیمانگەی نێودەوڵەتی سیهام باریی ئیتاڵی بەڕێوەچوو.

ئەوەی پێویستە بیزانیت: ساڵێك لەمەوبەر، کۆڕبەندی نێودەوڵەتیی هاوبەشی ئابووری و بازرگانی و پیشەسازیی کشتوکاڵی نێوان هەرێمی کوردستان و حکومەتی ئیتاڵیا بەڕێوەچوو، جێبەجێكردنی پرۆژەی كۆرێس، بەشێكە لە داواكارییەكانی حكومەتی هەرێمی كوردستان لەو كۆڕبەندە.

بۆچی گرنگە: جێبەجێكردنی پرۆژەكە، ڕۆڵی گرنگی دەبێت لە سەوزکردنی ژینگەی کوردستان و بەرەنگاربوونەوەی گۆڕانکارییەکانی کەشوهەوا و مسۆگەركردنی ئاسایشی خۆراک كە وا دەكات هەرێمی كوردستان لەبواری بەپیشەسازیكردنی زەیتی زەیتوون و بەبازاڕكردنی بەرهەمی زەیتوون و ئاشناكردنی جووتیارانی خاوەن باخی زەیتوون بە نوێترین سیستمی باخداری، بچێتە وەرچەرخانێكی مێژوویی.