شەپۆلێکی گەرما ڕوو لە عێراق دەکات و پلەکانی گەرما 47 پلە تێدەپەڕێنن

ئاڤا نیوز

دەستەی گشتیی کەشناسیی عێراق هۆشداری لە هاتنی شەپۆلێکی گەرما لە سەرجەم پارێزگاکانی عێراق و هەرێمی کوردستان دەدات و پێشبینی دەکرێت لەم هەفتەیەدا پلەکانی گەرما بەشێوەیەکی بەرچاو بەرز ببنەوە.

ڕاگەیێنراوی فەرمی: بەگوێرەی ڕاگەیێنراوی دەستەکە، پلەکانی گەرما بۆ ڕۆژی دووشەممە بەراورد بە ڕۆژی پێشوو نزیکەی 2 بۆ 3 پلەی سیلیزی بەرزتر دەبنەوە. لە بەغدای پایتەخت بەرزترین پلەی گەرما 43 پلە تۆمار دەکات، لە هەولێر 40 پلە و لە بەسرە 45 پلە دەبێت.

لە هەمان کاتدا: شێخ دارا، پێشکەشکاری کەشوهەوای ئاڤا میدیا، ڕایگەیاند، هەفتەی داهاتوو بەهۆی شەپۆلی دەریای ناوەڕاستەوە، شەپۆلێکی گەرم ڕوو لە عێراق و هەرێمی کوردستان دەکات و پلەکانی گەرما گۆڕانکارییان بەسەر دێت و کەشوهەوا گەرم دەبێت.

ئەوەی پێشبینی دەکرێت: کاریگەریی شەپۆلە گەرمەکە لە ڕۆژانی داهاتوودا زیاتر دەبێت، بەجۆرێک ڕۆژی سێشەممە لە زۆربەی ناوچەکان بەرزبوونەوەی زیاتر بەخۆوە دەبینێت. پێشبینی دەکرێت لە پارێزگای میسان بەرزترین پلەی گەرما بگاتە 47 پلە و لە بەسرە و زیقار 46 پلەی سیلیزی تۆمار بکرێت.

زانیاریی زیاتر: سەبارەت بە ڕۆژانی چوارشەممە تا هەینی، دەستەی کەشناسی ئاماژەی بەوە کردووە کە کەشوهەوا بە جێگیری دەمێنێتەوە و پلەکانی گەرما لە ئاستە بەرزەکانیاندا دەمێننەوە، لەگەڵ ئەگەری بەرزبوونەوەی کەمێک لە کۆتایی هەفتەدا. ئاسمانی ناوچەکانی ناوەڕاست و باشوور بە ساماڵی دەمێنێتەوە، بەڵام لە ناوچەکانی باکوور ئەگەری دەرکەوتنی هەندێک پەڵەهەور هەیە.

هەروەها باس لەوە کراوە کە با بە ئاراستەی باکووری ڕۆژئاوا و بە خێرایی مامناوەند هەڵدەکات، کە لەوانەیە لە هەندێک ناوچە ببێتە هۆی خۆڵبارین بەتایبەتی لە کاتەکانی نیوەڕۆدا.