دێرەزوور؛ لە ئۆپەراسیۆنێکی ئەمنیدا چەندین کەسی سەر بە سوپای پاسدارانی ئێران دەستگیرکران

ئاڤا نیوز

هێزەکانی ئاسایشی ناوخۆ لە پارێزگای دێرەزوور ئۆپەراسیۆنێکی ئەمنی بەرفراوانیان لە شاری ئەلبوکەمال و دەوروبەری ئەنجام دا، لە میانی ئۆپەراسیۆنەکەدا زیاتر لە 50 داواکراویان دەستگیرکرد، کە لەنێویاندا ژمارەیەک کەسی پەیوەست بە سوپای پاسدارانی ئێران هەن.

وێنە گەورەکە: دۆخێکی ئامادەباشیی ئەمنی بەرفراوان ناوچەکانی سوریای گرتووەتەوە، لە ڕۆژهەڵاتەوە تا باکوور و ڕۆژئاوا. ئەمەش هاوکاتە لەگەڵ فراوانکردنی هەڵمەتی ئەمنی لە دێرەزوور و دەستگیرکردنی ژمارەیەک ئەفسەری باڵای ڕژێمی پێشوو لە ناوچە کەناراوییەکان.

لێدوانی فەرمی: " عەقید زەرار شملان، فەرماندەی ئاسایشی ناوخۆ لە پارێزگای دێرەزوور، لە لێدوانێکدا دوای کۆتاییهاتنی ئۆپەراسیۆنەکە ڕایگەیاند: "ئەمڕۆ بەیانی، هێزەکانمان هەڵمەتێکی ئەمنی فراوان و وردیان لە شاری ئەلبوکەمال و دەوروبەری جێبەجێ کرد، کە بووە هۆی دەستگیرکردنی زیاتر لە 50 داواکراو بە چەندین دۆسیەی جۆراوجۆرەوە."

زانیاریی زیاتر: بە گوتەی فەرماندەی ئاسایشی ناوخۆی سووریا تۆمەتەکان بریتین لە "هەڵگرتن و بازرگانیکردنی نایاسایی بە چەک، بڵاوکردنەوەی ماددە هۆشبەرەکان و هەڕەشەکردن لە ئاسایش و سەلامەتیی هاووڵاتییان." ناوبراو جەختی لەوە کردەوە کە "لە میانەی ئۆپەراسیۆنەکەدا، ژمارەیەک کەسی پەیوەست بە سوپای پاسدارانی ئێران دەستگیر کراون."