بۆ دووەم جار ئیسرائیل ئەندامانی "شانەیەکی ئێرانی" لە سووریا دەستگیر دەکات

ئاڤا نیوز

بۆ دووەم جار لە هەفتەیەکدا، سوپای ئیسرائیل لە ئۆپەراسیۆنێکی هەواڵگری دا ئەندامانی "شانەیەکی ئێرانی" لە باشووری سووریا دەستگیرکرد.

ڕاگەیێنراوی فەرمی: بەگوێرەی ڕاگەیێنراوی سوپای ئیسرائیل، شەوی یەکشەممە سوپا بە پشتبەستن بە زانیاریی هەواڵگری لە ئۆپەراسیۆنێکدا شانەیەکی ئێرانی کە سەر بە سوپای پاسدارانی ئێران بوونە لە ناوچەی تەل قەندە لە باشووری سووریا دەستگیرکرد.

زانیاریی زیاتر: لە ڕۆژی سێی ئەم مانگە، هێزەکانی لیوای 474ـی سەر بە فرقەی 210ـی سوپای ئیسرائیل لە ئۆپەراسیۆنێکی تایبەتدا شانەیەکی "تێکدەر" کە لەلایەن ئێرانەوە جووڵەی پێکرابوو لە ناوچەی ئوم ئەللوقس و عەین ئەلبەسەلی لە باشووری سوریا دەستگیرکرد.

ئەوەی پێویستە بیزانیت: لە حوزەیرانی ساڵی 1967 ئیسرائیل دەستی بەسەر نزیکەی 1250 کیلۆمەتر چوارگۆشەی لە بەرزاییەکانی جۆلان لە سووریادا گرت و پاشان لە ساڵی 1981دا بە کردەیی لکاندی بەخۆیەوە. لە دوای ڕووخانی ڕژێمەکەی ئەسەد لە کۆتاییەکانی 2024، هەژموونی خۆی لە ناوچەکانی جۆلانی سووریا بەهێزتر کردووە.