سەرۆککۆماری ئێران ئاشکرای دەکات ئیسرائیل هەوڵی کوشتنی داوە

ئاڤا نیوز

سەرۆککۆماری ئێران لە نوێترین چاوپێکەوتنیدا ئاشكرای دەکات کە ئیسرائیل هەوڵی تیرۆرکردنی ئەوی داوە، بەڵام شكستی هێناوە.

لێدوانی فەرمی: مەسعوود پزیشکیان، سەرۆککۆماری ئێران لە چاوپێکەوتنێکی لەگەڵ تاکەر کارلسۆن، پێشکەشكارێکی ئەمریکی ئەنجامدا و تیادا چەندین پرسی وروژاند و لە وەڵامی پرسیارێکیشدا ڕایگەیاند، "ئیسرائیل هەوڵی داوە من تیرۆر بکات، بەڵام شكستیان هێنا".

 لە درێژەی قسەکانیدا دەڵێت، ئێران هیچ کات هەوڵی نەداوە دۆناڵد ترەمپ، سەرۆکی ئەمریکا تیرۆر بکات.

• "ئێمە هەرگیز بەدوای چەکی ئەتۆمیدا نەگەڕاوین و بەدوایدا ناگەڕین، نەتانیاهۆ لە ساڵی 1992ـەوە ئەو بیرۆکەیە لە مێشکی دەچێنێت کە ئێران بەدوای چەکی ئەتۆمیدا دەگەڕێت و هەر سەرۆکێکی ئەمریکی گەیشتووەتە دەسەڵات ئەم بۆچوونەی لە مێشکی خۆیدا بەهێز کردووە".
  
  - "ئێمە دەستپێشخەری جەنگ نەبووین و نامانەوێت شەڕ بەردەوام بێت، لەو ڕۆژەوە کە بەرپرسیارێتیم لە ئەستۆ گرتووە، دروشمی من دروستکردنی یەکڕیزی لە ماڵەوە و بەرقەرارکردنی ئاشتی و ئارامی بووە لەگەڵ دراوسێکان و جیهاندا."
  
  باکگراوند: ئیسرائیل لە 13-6-2025، دەیان پێگەی سەربازی، فەرماندەی باڵا و زانای ئەتۆمی ئێرانی لە ناوخۆی ئەو وڵاتە کردە ئامانج، دوای ئەو هێرشەی ئیسرائیلییەکان، ئەمریکاش هێرشی ئاسمانیی کردە سەر بنکە ئەتۆمییەکانی ئێران و بەگوتەی ترەمپ لەو هێرشەکەدا بنکە ئەتۆمییەکانی نەتەنز، ئیسفەهان و فۆردۆ خاپوور کران