دەستەی دەستپاکیی عێراق کاندیدانی هەڵبژاردن ناچار دەکات سەروەت و سامانیان ئاشكرا بکەن

ئاڤا نیوز

لە کۆنگرەیەکی ڕۆژنامەوانیدا دەستەی دەستپاکی عێراق ڕایگەیاند، هەموو کاندیدانی هەڵبژاردن و سەرۆکی حزبەکانی بەشدار لە هەڵبژاردن ناچار دەکرێن بە پێشکەشکردنی ڕاپۆرتی ئاشکراکردنی سەروەت و سامانیان.

 

وێنە گەورەکە: بڕیارە ڕۆژی 11-11-2025 هەڵبژاردنی پەرلەمانی عێراق بەڕێوەبچێت. ڕۆژی 26-6 دوا وادە بوو بۆ وەرگرتنی ناوی کاندیدان لەلایەن کۆمیسیۆنی باڵای سەربەخۆی هەڵبژاردنەکانەوە.

 

ڕاگەیێنراوی فەرمی: ئەمڕۆ سێشەممە، محەممەد عەلی لامی، سەرۆکی دەستەی دەستپاکی لە کۆنگرەیەکی ڕۆژنامەوانیدا بە هاوبەشی لەگەڵ کۆمسیۆنی باڵای سەربەخۆی هەڵبژاردنەکانی عێراق ڕایگەیاند، لەسەر هەموو کاندید و سەرۆکی حزبێکی بەشدارە لە هەڵبژاردنەکان ڕاپۆرتی ئاشکراکردنی سەروەت و سامانیان پێشکەش بە دەستەکە بکەن. هاوکات لەگەڵ کۆمسیۆن و دەستە تیمێکی هاوبەشی مەیدانی دروست دەکەن بۆ چاودێریکردنی ئەو پێشێلکارییانەی لە کاتی بانگە دەکرێن.

 

سەرۆکی دەستە ئاماژەی بەوەدا ژمارە (5080) دیاریکراوە بۆ وەرگرتنی سکاڵاکان و پەیوەندیکردن بێ بەرامبەرە.

 

لێدوانی فەرمی: مەروان محەممەد، بەرپرسی لقی هەولێری کۆمسیۆنی باڵای سەربەخۆی هەڵبژاردنەکان بە ئاڤا میدیای ڕاگەیاند، ئەم ڕێکارە یەکەمجارە لەلایەن دەستەی دەستپاکییەوە پەیڕەو دەکرێت. بۆ ئەوەیە سەرچاوەی دارایی کاندید دیار بێت و دەرکەوێت ئەو پارەیەی بانگەشەی پێ دەکات سەرچاوەکەی لە کوێوەیە. ئەمە جگە لەوەی کۆمسیۆن خۆی یاسایەکی هەیە بەناوی (خەرجی هەڵبژاردن) بەپێی یاساکە هەر کاندید و حزبێک ڕێژەیەکی بۆ دیاریکراوە کە لە بانگەشە بەکاری دەهێنێت و دەبێت ئەو لایەنە لەگەڵ کاندیدەکە هەژماری بانکییان هەبێت و پارەکەی دیار بێت.

زانیاریی زیاتر: مەروان محەممەد ئەوەش دەڵێت: ناوی کاندیدەکانمان ناردووە بۆ بەغدا و هێشتا وردبینی لە ناوەکان دەکرێت. دوای ئەوەی تەواو کرا ئینجا بۆ دەستەی دەستپاکی و وەزارەتی خوێندنی باڵا دەنێردرێت.  109 کاندید لە هەولێر ناوی خۆیان تۆمار کردووە.