وەزارەتی بازرگانی عێراق بەنیازە پڕۆسەی بەبازاڕکردنی گەنمی جووتیارانی کوردستان کۆتایی پێبهێنێت

ئاڤا نیوز

لیژنەی ناوەندیی بەبازاڕکردن لە وەزارەتی بازرگانیی عێراق تاوتوێی کۆتایی هێنان بە پڕۆسەی بەبازاڕکردنی گەنمی جووتیاران لە پارێزگاکانی هەرێمی کوردستان دەکات.

وێنە گەورەکە: عێراق ساڵانە پێویستی بە پێنج ملیۆن تۆن گەنم هەیە و بە وتەی بەرپرسانی وەزارەتی بازرگانی ئەمساڵیش بۆ سێیەمین ساڵ لەسەر یەک عێراق دەگاتە ئاستی خۆبژێوی لە بەرهەمی گەنم و بڕە زیادەکەش هەناردەی دەرەوەی وڵات دەکرێت.

ڕاگەیێنراوی فەرمی: وەزارەتی بازرگانیی عێراق ڕایگەیاند: لیژنەی ناوەندی بەبازاڕکردن لە کۆمپانیای گشتی بۆ بازرگانی دانەوێڵە دانیشتنی 16ـەمینی خۆی کرد بۆ گفتوگۆکردن لەسەر دانانی وادەی ڕاگرتنی وەرزی بەبازاڕکردنی گەنم لە هەرێمی کوردستان. سەرکەوتنی وەرزی بەبازاڕکردنی ئەمساڵی دووپات کردەوە، ئاماژەی بەوەشکرد، پلانە پەسەندکراوەکان یارمەتیدەر بوون لە ڕێکخستنی پڕۆسەکە و بەرزکردنەوەی کاراییەکەی.

لەلایەکی دیکەوە: بەگوێرەی وەزارەتی کشتووکاڵی عێراق، ڕۆژی 12ـی ئەم مانگە وەرزی بەبازاڕکردنی گەنم کۆتایی دێت و سایلۆی مەخموور کۆتا شوێن دەبێت کە پڕۆسەی کڕینەوەی گەنمی تێدا ڕادەگیرێت، تائێستاش چوار ملیۆن و 500 هەزار تۆن گەنم لە جووتیارانی وەرگیراوە.