کۆمیسیۆن لەبارەی بانگەشەوە هۆشداریی دەداتە کاندیدەکان

ئاڤا نیوز

 

کۆمیسیۆنی هەڵبژاردنەکانی عێراق دەڵێت، بەشێک لە کاندیدەکان دەستیانکردووە بە بانگەشە و ژمارەی هەڵبژاردنی خۆیان چاپ و بڵاوکردووەتەوە، ئاشکراشی دەکات کە کاندیدەکان تا ئێستا ناوەکانیان پەسەند نەکراوە و بە فەرمی نەبوونەتە کاندید.

 

وێنە گەورەکە: بڕیارە هەڵبژاردنی خولی شەشەمی پەرلەمانی عێراق ڕۆژی (11-11-2025) بەڕێوەبچێت، هەرچەندە ئامارێکی فەرمیش لەبەردەست نییە بەڵام باس لەوەدەکرێت خەرجی هەڵبژاردنەکە ژمارەکانی پێش خۆی تێپەڕێنێت و بگاتە سێ تریلیۆن دینار.

 

لێدوانی فەرمی: د.عیماد جەمیل، سەرۆکی تیمی میدیایی کۆمیسیۆنی هەڵبژاردنەکان ڕایگەیاند، کۆمیسیۆن پێشێلکاریی چەند کەسێکی تۆمار کردووە کە ژمارەی خۆیان وەک کاندید بڵاوکردووەتەوە، لەکاتێکدا ئەنجوومەنی کۆمیسیاران لیستی کاندیدەکانی پەسەند نەکردووە، چونکە تا ئێستا ڕاپۆرتی هەڵسەنگاندنی شایستەیی کاندیدەکان لەلایەن لایەنە پەیوەندیدارەکانەوە بۆ کۆمیسیۆن نەگەڕاوەتەوە.

 

ئاماژەی بەوەشكردووە، تا کۆمیسیۆن لیستی کاندیدەکان پەسەند نەکات، هیچ کەسێک بە فەرمی ناوی کاندید وەرناگرێت، ئێستاش پرۆسەی وردبینیی لە ناوی کاندیدەکان بەردەوامە.