ئەمریکا: دەمانەوێت کورد دەرفەتی پێبدرێت ببێتە بەشێک لە حکومەتی سووریا

ئاڤا نیوز

تۆم باراک، نێردەی ئەمریکا بۆ کاروباری سووریا، لەبارەی دۆخی سووریا و پەیوەندییەکانی نێوان حکومەتی دیمەشق و هێزەکانی سووریای دیموکرات (هەسەدە) پێی وایە هێشتا هەردوولا لەسەر پلانی تێکەڵکردنی هێزەکان ناکۆکن.

وێنە گەورەکە: دوای واژۆکردنی ڕێكکەوتنێکی هەشت خاڵی لە مانگی ئاداری ڕابردوو لەنێوان مەزڵووم عەبدی، فەرماندەی گشتیی هەسەدە و ئەحمەد شەرع، سەرۆککۆماری سووریا، هەوڵەکانی ئەمریکا بەردەوامە بۆ یەکگرتنەوەی هێزەکانی هەسەدە و سووریا.

لێدوانی فەرمی: تۆم باراک، نێردەی ئەمریکا بۆ کاروباری سووریا بە ئاژانسی ئەسیۆشێتد پرێسی ڕاگەیاندووە، پێم وانییە هیچ پێشکەوتنێک لە گفتوگۆکانی نێوان حکومەتی سووریا و کورددا هەبێت و هێشتا هەردوولا لەسەر پلانی تێکەڵکردنی هێزەکانیان ناکۆکن.

باراک دەڵێت، "دیمەشق کارێکی نایابی کردووە لە پێشکەشکردنی بژاردە بەهێزەکانی سووریای دیموکرات (هەسەدە) بۆ ئەوەی لەبەرچاوی بگرن و واشنتن متمانەی تەواوی بە حکومەتی سووریا و سوپا نوێیەکەی هەیە".

زانیاریی زیاتر: لەبارەی هەسەدەوە باراک وتی، "هێزەکانی سووریای دیموکرات هاوبەشێکی گرنگ بوون لە شەڕی دژی داعش و دەمانەوێت دڵنیابینەوە کە دەرفەتێکی شایستەیان پێدەدرێت بۆ تێکەڵبوون لەگەڵ حکومەتی سووریا.

سەبارەت بە هێزەکانی ئەمریکا لە سووریا وتی، واشنتن پەلەی نییە لە کشانەوەی تەواوەتیی هێزەکانی لە سووریا.