وەزارەتی دەرەوەی ئەمریکا زیاتر لە هەزار کارمەندی لە کارەکانیان دووردەخاتەوە

ئاڤا نیوز

وەزارەتی دەرەوەی ئەمریکا لە چوارچێوەی گۆڕانکاری و سەرلەنوێ داڕشتنەوەی سێکتەری دیپلۆماسی لەلایەن ئیدارەی دۆناڵد ترەمپەوە، دەست بە دەرکردنی زیاتر لە هەزار و 350 کارمەندی نیشتەجێی ئەمریکا دەکات. ڕەخنەگران دەڵێن ئەم هەنگاوە توانای ئەمریکا بۆ بەرگریکردن و برەودان بە بەرژەوەندییەکانی لە دەرەوەی وڵات کەم دەکاتەوە.

زانیاریی بەدەستهاتوو: بەگوێرەی ئاگادارییەکی وەزارەتی دەرەوە کە ئاژانسی ڕۆیتەرز بەدەستیگەیشتووە، ئەم هەنگاوە هەزار و 107 کارمەندی خزمەتگوزاریی شارستانی و 246 کارمەندی کاروباری دەرەوە دەگرێتەوە کە لە ئەمریکا کار دەکەن.

لە ئاگادارییەکەی وەزارەتی دەرەوەی ئەمریکا هاتووە: "وەزارەت کارە ناوخۆییەکانی ڕێکدەخاتەوە بۆ ئەوەی سەرنج بخاتە سەر ئەرکە لەپێشینەکانی دیپلۆماسی."

زانیاریی زیاتر: "کەمکردنەوەی ژمارەی کارمەندان بە وردی داڕێژراوە بۆ ئەوەی کاریگەری لەسەر ئەو ئەرکانە هەبێت کە سەرەکی نین، یان ئەو نووسینگانەی کە کاری دووبارە یان زیادەیان هەیە، و ئەو نووسینگانەی کە دەکرێت کاراییان بە شێوەیەکی بەرچاو تێدا بەرز بکرێتەوە."

ئەم هەنگاوە یەکەم قۆناغی ئەو داڕشتنەوەیەیە کە ترەمپ داوای کردووە بۆ دڵنیابوون لەوەی سیاسەتی دەرەوەی ئەمریکا لەگەڵ ئەجێندای "ئەمریکا لە پێش هەموو شتێکەوە" یەکدەگرێتەوە.

پێشتر ترەمپ فەرمانی بە وەزارەتی دەرەوە کردبوو کە خزمەتگوزاریی دەرەوە چاکسازی تێدا بکات بۆ دڵنیابوون لەوەی سیاسەتی دەرەوەی سەرۆکی کۆمارییەکان "بە دڵسۆزییەوە" جێبەجێ دەکرێت.

ئەوەی پێویستە بیزانیت: بڕیار بوو پرۆسەی داڕشتنەوەکە تا یەکی تەممووز بەشێوەیەکی گشتی کۆتایی پێبێت، بەڵام بەهۆی کێشەی یاساییەوە وەک پلانی بۆ دانرابوو بەڕێوەنەچوو، چونکە وەزارەتی دەرەوە چاوەڕێی بڕیاری دادگای باڵای ئەمریکای دەکرد سەبارەت بە هەوڵی ئیدارەی ترەمپ بۆ ڕاگرتنی فەرمانێکی دادوەری کە ڕێگری لە دەرکردنی بەکۆمەڵی کارمەندان دەکرد.

ئەمەش بزانە: ڕۆژی سێشەممەی ڕابردوو، دادگا ڕێگەی بۆ ئیدارەی ترەمپ خۆشکرد کە بەردەوام بێت لەسەر کەمکردنەوەی کارمەندان و بچووککردنەوەی کارەکانی چەندین ئاژانس، ئەمەش بڕیارێکە کە دەکرێت ببێتە هۆی دەرکردنی دەیان هەزار کارمەند و سیاسەتی دەرەوەی ئەمریکا دووبارە دابڕێژێتەوە.