عەباس عێراقچی: ئێران هەماهەنگی لەگەڵ ئاژانسی نێودەوڵەتی وزەی ئەتۆم ڕانەگرتووە

ئاڤا نیوز

وەزیری دەرەوەی ئێران ڕایدەگەیەنێت، وڵاتەکەی هەموو هەماهەنگییەکی لەگەڵ ئاژانسی نێودەوڵەتی وزەی ئەتۆم ڕانەگرتووە و مەرجی تاران بۆ دەستپێکردنەوەی دانوستاندنەکان دەخاتەڕوو.

وێنە گەورەکە: هەفتەی ڕابردوو مەسعود پزیشکیان، سەرۆککۆماری ئێران واژۆی لەسەر یاسای هەڵپەساردنی هەماهەنگییەکان لەگەڵ ئاژانسی نێودەوڵەتی وزەی ئەتۆم کرد، پێشتریش سەبارەت بە سەرۆکی ئاژانسەکە ڕایگەیاندبوو، بەهۆی ڕاپۆرتی هەڵەی ئەوەوە جەنگ و پشێوی لە ڕۆژهەڵاتی ناوەڕاست دروست بوو، لە کاتێکدا هەموو پێگە ئەتۆمییەکان لە ژێر چاودێری ڕاستەوخۆی ئاژانسەکە بووە و هیچ زانیارییەکی ڕاپۆرتەکە ڕاست نەبووە.

لێدوانی فەرمی: عەباس عێراقچی، وەزیری دەرەوەی ئێران لە کۆبوونەوەیەکیدا لەگەڵ نوێنەران و  باڵیۆزانی دەوڵەتان لە تاران ڕایگەیاند، بەرنامەی ئەتۆمی ئێران ئاشتیخوازانە بووە و بەو شێوەیەش دەمێنێتەوە، ئێران ئەندامێکی پابەندی ڕێککەوتنامەی ڕێگریکردن لە بڵاوکردنەوەی چەکی ئەتۆم بووە، پابەندی ڕێککەوتنامەی نێوان ئێران و ئاژانسی نێودەوڵەتی وزەی ئەتۆم بووین و ئێستاش هەماهەنگی ئێمە لەگەڵ ئاژانسی نێودەوڵەتیی وزەی ئەتۆم ڕانەگیراوە، بە دڵنیاییەوە شێوازێکی دیکەی پەیوەندی وەرگرتووە کە ئەمەش ئاساییە بە هۆی ئەو بارودۆخ و گۆڕانکارییانەی ڕوویانداوە.

لەلایەکی دیکەوە: وەزیری دەوەی ئێران سەبارەت بە دەستپێکردنەوەی دانوستانەکان لەسەر بەرنامەی ئەتۆمی ڕایگەیاند، مەرجی سەرەکی تاران بۆ دەستپێکردنەوەی دانوستاندنەکان زامنکردنی دووبارە هێرشنەکردنەوەی سەر ئێرانە و بەبێ دڵنیابوونەوە لەو مەرجە دانوستانەکان دەستپێناکەنەوە.