دهۆک و زاخۆ گەیشتن بە یاریی کۆتایی جامی عێراق

ئاڤا نیوز

زاخۆ و دهۆک مێژوویان تۆمارکرد، دوای بردنەوەیان لە دوو یانەی شاری بەغدا گەیشتن بە یاریی کۆتایی جامی عێراق، چوارشەممەی داهاتوو لە بەغدا کێبڕکێی بەدەستهێنانی نازناوەکە دەکەن.

چی ڕوویدا: لەیاریی یەکەم لەشاری دهۆک، هەڵۆکانی چیا میوانداری قوە جەوییەیان کرد و یارییەکەیان بە 3 گۆڵ بەرامبەر بە گۆڵێک لێ بردەوە و بوونە لایەنێکی یاریی داهاتوو، گۆڵەکانی دهۆک لەڕێگەی یاریزانان کەریم دەروێش دوو گۆڵ و هارون ئەحمەدەوە تۆمارکرا، تاکە گۆڵی جەوییەش محەممەد جەواد کردی.

لەلایەکی دیکەوە: لەیاریی دووەم زاخۆ و شورتەی هەڵگری نازناو لەبەردەم هەزاران هاندەری قەڵا سوور کەوتنە ڕکابەری بەدەستهێنانی بلیتی دووەم، لە کاتی ئاسایی و زیادکراودا تۆڕی هەردوو یانە بەخاوێنی مایەوە، بۆ یەکلایکردنەوەی براوە ناوبژیوان پەنای بردە بەر لێدانی یەکلایکەرەوە لە خاڵی سزا، زاخۆ پشتئەستوور بە لێهاتوویی عەلی کازمی گۆڵپارێز بە چوار گۆڵ بەرامبەر بە سێ گۆڵ یارییەکەیان بردەوە و گەیشتنە یاریی کۆتایی.

ئەوەی پێویستە بیزانیت: هەردوو یانەکەی بادینان، ڕۆژی چوارشەممەی داهاتوو لە بەغدا لە یاریی کۆتایی بەیەک دەگەن، ئەمەش یەکەمین جارە لەمێژووی 50 ساڵەی پاڵەوانێتییەکە دوو یانەی کوردی بگەنە یاری کۆتایی جامی عێراق.