دوو تەرزی نوێی گەنم لە هەرێمی کوردستان تۆمار دەکرێن

ئاڤا نیوز 

ئەمساڵ دوو تەرزی نوێی گەنم لە هەرێمی کوردستان تۆمار کراون، کە بۆ کەشوهەوای زۆرینەی ناوچەکان گونجاوە و بەرهەمیشی زیاترە. 

وێنە گەورەکە: ساڵانە توێژینەوە لەسەر ژمارەیەک تەرزی نوێی گەنم و جۆ دەکرێت، ئەمەش بۆ ئەوەیە باشترین تەرز لە ڕووی بڕشت و گونجاوی جۆرەوە لەگەڵ کەشوهەوای ناوچەکە تۆمار بکرێن.

لێدوانی فەرمی: عەبدولسەمەد محەممەد، بەڕێوەبەری توێژینەوەی کشتوکاڵی هەولێر بە ئاڤامیدیای گوت: ئەمساڵ تاقیکردنەوەمان لەسەر 360 تەرزی گەنم کردووە، هەرچەندە کەمی ڕێژەی بارانبارین کاریگەریی لەسەر کارەکانمان دروستکردووە، بەڵام لەگەڵ ئەوەشدا توانیمان دوو تەرزی نوێی گەنم بە ناوەکانی هەولێر 10 و هەولێر 14 تۆمار بکەین.

ئەوەی پێویستە بیزانیت : تایبەتمەندییەکانی دوو تەرزە نوێیەکە ئەمانەن: 

- بەرووبوومیان زۆرە و کێبڕکێی ئەو تەرزانە دەکەن کە لە دەرەوە هاوردە دەکرێن.
- توانای بەرگرییان بۆ کەمئاوی و پلەی گەرمی و نەخۆشی بەرز.
- باڵایان کورتە و زوو پێدەگەن.

ئەمەش بزانە: لە ساڵانی ڕابردوودا بەڕێوەبەرایەتیی توێژینەوەی کشتوکاڵی هەولێر، شەش تەرزی گەنم و دوو تەرزی جۆی پەسەند کردووە، کە بۆ کەشوهەوای هەرێمی کوردستان گونجاون و تەرزی بەبڕشتن.