پارتی و یەکێتی لەسەر ئاستی باڵا کۆدەبنەوە و سەرۆک بارزانی بەشداریی دەکات

ئاڤا نیوز

بڕیارە سبەی پارتی و یەکێتی لەسەر ئاستیی باڵا بە ئامادەبوونی سەرۆک بارزانی کۆببنەوە، چاوەڕوان دەکرێت بافڵ تاڵەبانی، سەرۆکی یەکێتی و مەسرور بارزانی، سەرۆکوەزیرانی هەرێمی کوردستان و قوباد تاڵەبانی، جێگری سەرۆکوەزیران ئامادە بن.

چیرۆکی سەرەکی: قووڵبوونەوەی کێشەکانی نێوان هەولێر و بەغدا، کاردانەوەی لایەنە سەرەکییەکانی کوردستانی بەدوای خۆیدا هێناوە، دوێنێ مەکتەبی سیاسیی پارتی کۆبووەوە و بڕیارە سبەی دووشەممەش پارتی و یەکێتی کۆببنەوە.

لێدوانی فەرمی: فازڵ میرانی، به‌رپرسی ده‌سته‌ی كارگێڕیی مەکتەبی سیاسیی پارتی دیموکراتی کوردستان بە ئاڤای گوت،"سبەی کۆبوونەوەیەکی گرنگ بۆ چارەسەری کێشەی مووچە لەنێوان پارتی و یەکێتی بەڕێوە دەچێت و سەرۆک بارزانیش بەشدار دەبێت."

زانیاریی زیاتر: بەگوێرەی زانیارییەکانی کوردستان حەسەن، پەیامنێری دیپلۆماسی ئاڤا؛ کۆبوونەوەکە لە پیرمام بەڕێوە دەچێت، بافڵ تاڵەبانی، سەرۆکی یەکێتی سەرۆکایەتیی شاندی حیزبەکەی دەکات، کۆبوونەوەکەش بۆیەکخستنی هەڵوێست و یەكدەنگییە سەبارەت بە كێشەكانی نێوان هەولێر و بەغدا و پرسی مووچە و  هەناردەکردنەوەی نەوتی کوردستان.

ئەمەش بزانە: ماوەی 73 ڕۆژە مووچەخۆرانی هەرێمی کوردستان بە بڕیارێکی سیاسیی دەسەڵاتدارانی عێراق مووچەیان ڕاگیراوە، ئەمەش کاریگەری لەسەر ژیان و گوزەرانی هەموو هاووڵاتییان بەگشتی دروستکردووە تاوەکو ئێستا ئەو گرفتە چارەسەر نەکراوە.