بەڕێوەبەری پێشووی بانکێکی حکومی لەسەر دزینی زیاتر لە 211 ملیار دینار دەستگیر دەکرێت

دەستەی دەستپاکی فیدراڵی، توانی بەرپرسێکی پێشووی بانکێکی حکومی لە لقی میسان دەستگیر بکات، بە تۆمەتی بردنی سامانی گشتی و زیانگەیاندن و بەهەدەردانی سامانی گشتی بە بڕی نزیکەی چارەکە ترلیۆنێک دینار.

وێنە گەورەکە: لە دوای ساڵی 2003 گەندەڵی لە عێراق بووەتە باوترین دیاردە و سەرجەم دامەزراوەکانی دەوڵەتی گرتووەتەوە، ئێستاش گەیشتووەتە ئاستێكی مەترسیدار و حکومەت ناتوانێت بنبڕی بکات. لەهەمان کاتدا بەهۆی زۆری دۆسییەكانی گەندەڵییەوە، عێراق لە ڕیزبەندی شەفافییەتی وڵاتاندا  لە پاشەكشەدایە و لە پلەی 140دایە.

ڕاگەیێنراوی فەرمی: بەگوێرەی ڕاگەیێنراوی دەستەکە "هەوڵەکان بۆ بەدواداچوونی جووڵەی تاوانباری هەڵاتوو (ئیبتسام کامل ناسر)، بەڕێوەبەری پێشووتری بانکی کشتوکاڵی کە بە زانیاریی وەرگیراو پشتیوانی کرابوو، گەیشتە ئەنجام و دوای گەڕان و پشکنینێکی چڕ، شوێنی نیشتەجێبوونی دۆزرایەوە."

چی ڕوویدا: "ئەو تیمەی کە لە نووسینگەی لێکۆڵینەوەی میسان پێکهاتبوو، دوای گواستنەوەی بۆ شوێنی نیشتەجێبوونی تاوانبارەکە لە قەزای زوبێر لە بەسرە، توانی دەستگیری بکات و فەرمانی دەستگیرکردنەکەی جێبەجێ بکات.

ئەوەی لەوبارەیەوە دەگوترێت: پێشتر دادگای تایبەتمەند - دوای ئاگاداربوون لە بەڵگەکان و دۆزینەوەیان وەک بەڵگەی تەواو و باوەڕپێکراو بۆ سزادانی - سزای غیابی بەسەردا سەپاندبوو، کۆی ئەو سزایانەشی کە بەسەر تاوانبارەکەدا سەپێنراون، دەگاتە (37) ساڵ زیندانیکردن، لە کاتێکدا کۆی ئەو بڕە پارانەی کە دادگا بڕیاری گەڕاندنەوەی داوە لەو دۆسییانەدا بریتییە لە 211 ملیار و 737 ملیۆن و 649 هەزار دینار. هەروەها هۆشداریی دا کە "(10) دۆسیەی دیکە لەژێر لێکۆڵینەوەدان" سەبارەت بە ناوبراو.