تورکیا ئەو دەنگۆیانەی باس لە هەڵوەشاندنەوەی گەشتەکانی بۆ ئوردن و عێراق و ئێران دەکات، ڕەتدەکاتەوە

ئاڤا نیوز

تورکیا ڕەتی دەکاتەوە، گەشتەکانی بۆ وڵاتانی ئێران، عێراق و ئوردن هەڵوەشاندبێتەوە و دەڵێت، سەرجەم ئەو هەواڵانەی لەوبارەیەوە بڵاودەکرێنەوە بێ بنەمان و گەشتە ئاسمانییەکانی تورکیا بۆ ئەو وڵاتانە بەردەوامە.

وێنە گەورەکە: لە چەند میدیایەکی جیهانی باس لەوە دەکرێت کە هێڵی ئاسمانی تورکیا، سەرجەم گەشتەکانی بۆ ئاسمانی ئێران، عێراق و ئوردن هەڵوەشاندووەتەوە، ئەمەش نیشانەی بوونی مەترسی هێرشی درۆنییە لە نێوان وڵاتانی ناوچەکە، بە تایبەت ئێران و ئیسرائیل.

بڵاوکراوەی فەرمی: ڕۆژنامەی حورییەتی تورکی ڕایگەیاند، هێڵی ئاسمانی تورکیا ئەو هەواڵانە ڕەتدەکاتەوە کە لە چەند میدیایەکی بیانی بڵاوکراوەتەوە، گوایە گەشتەکانی بۆ چەند وڵاتێک هەڵوەشاندبێتەوە، ڕاست نییە و ئێوارەی ئەمڕۆ هیچ گەشتێکی هێڵی ئاسمانیی تورکیا بۆ عێراق و ئوردن و ئێران هەڵنەوەشێندراوەتەوە.

بە گوێرەی هەمان سەرچاوە، سەرجەم گەشتە ئاسمانییەکانی کۆمپانیا گەشتیارییەکانی تورکیا بەردەوامن.